'പോലീസിനെ വിളിക്കൂ, എനിക്ക് കീഴടങ്ങണം'; മൗണ്ട് കൈലാഷ് കൊലപാതകക്കേസിൽ ഡോക്ടർ അറസ്റ്റിൽ

ഡൽഹിയിലെ സൗത്ത് ഡൽഹിയിലെ മൗണ്ട് കൈലാഷ് മേഖലയിലെ കൊലപാതകക്കേസിൽ പ്രമുഖ ത്വക്ക് രോഗ വിദഗ്ധനായ ഡോ. മനീഷ് ഗുപ്തയെ പൊലീസ് അറസ്റ്റ് ചെയ്തു. വീട്ടുജോലിക്കാരിയായ 45-കാരി മീനയെ ക്രൂരമായി കൊലപ്പെടുത്തിയെന്നാണ് കേസ്. കൊലപാതകത്തിന് പിന്നാലെ പ്രതി തന്നെ "പോലീസിനെ വിളിക്കൂ, എനിക്ക് കീഴടങ്ങണം" എന്ന് പറഞ്ഞതായി അന്വേഷണ ഉദ്യോഗസ്ഥർ അറിയിച്ചു. 

വ്യാഴാഴ്ച രാവിലെ വീട്ടിലെ ടെറസിൽ രക്തത്തിൽ കുളിച്ച നിലയിലാണ് മീനയുടെ മൃതദേഹം കണ്ടെത്തിയത്. ക്രിക്കറ്റ് ബാറ്റ് ഉപയോഗിച്ച് മർദിച്ച ശേഷമാണ് കത്തി ഉപയോഗിച്ച് നിരവധി തവണ കുത്തിയതെന്നാണ് പ്രാഥമിക അന്വേഷണത്തിൽ കണ്ടെത്തിയത്. സംഭവസ്ഥലത്ത് നിന്ന് ബാറ്റും കത്തിയും പൊലീസ് പിടിച്ചെടുത്തു. 

കുടുംബത്തിൽ തുടർച്ചയായി ഉണ്ടായിരുന്ന പ്രശ്നങ്ങൾക്ക് വീട്ടുജോലിക്കാരി കാരണക്കാരിയാണെന്ന സംശയവും, അവർ ദുര്‍മന്ത്രവാദം നടത്തിയെന്ന വിശ്വാസവുമാണ് ആക്രമണത്തിലേക്ക് നയിച്ചതെന്ന വിവരങ്ങൾ പുറത്തുവന്നിട്ടുണ്ട്. എന്നാൽ കൊലപാതകത്തിന്റെ യഥാർഥ കാരണം സംബന്ധിച്ച് അന്വേഷണം തുടരുകയാണെന്നും എല്ലാ സാധ്യതകളും പരിശോധിച്ചുവരികയാണെന്നും ഡൽഹി പൊലീസ് വ്യക്തമാക്കി. 

അറസ്റ്റിലായ ഡോക്ടർ വിഷാദരോഗത്തിനുള്ള ചികിത്സയും മറ്റ് മാനസിക ആരോഗ്യപ്രശ്നങ്ങൾക്കും മരുന്ന് കഴിച്ചിരുന്നതായി പൊലീസ് അറിയിച്ചു. കൊലപാതകത്തിന് ശേഷം ആത്മഹത്യയ്ക്ക് ശ്രമിച്ചതായും അന്വേഷണത്തിൽ വ്യക്തമായിട്ടുണ്ട്. അതേസമയം, മാനസികാവസ്ഥയാണോ കുറ്റകൃത്യത്തിന് പിന്നിലെ പ്രധാന കാരണമെന്നതടക്കമുള്ള കാര്യങ്ങൾ വിശദമായി പരിശോധിച്ചുവരികയാണ്. 

15 വർഷത്തിലേറെയായി ഡോക്ടറുടെ വീട്ടിൽ ജോലി ചെയ്തിരുന്ന മീനയുടെ മരണത്തിൽ പ്രദേശത്ത് വലിയ പ്രതിഷേധമാണ് ഉയർന്നിരിക്കുന്നത്. പോസ്റ്റ്മോർട്ടം റിപ്പോർട്ടും ഫോറൻസിക് പരിശോധനാഫലങ്ങളും ലഭിച്ച ശേഷമേ കൊലപാതകത്തിന്റെ കൃത്യമായ സാഹചര്യങ്ങൾ വ്യക്തമാകൂ എന്നും പൊലീസ് അറിയിച്ചു.