ഇ-റിക്ഷകൾക്ക് ഭീഷണിയായ ആപ്പുകൾ നീക്കി കേന്ദ്രം; സുരക്ഷാ ആശങ്കകൾക്ക് പിന്നാലെ നടപടി

ഇ-റിക്ഷകൾ വിദൂരത്തിരുന്ന് പ്രവർത്തനരഹിതമാക്കാൻ ദുരുപയോഗം ചെയ്യപ്പെടുന്നതായി കണ്ടെത്തിയതിനെ തുടർന്ന് രണ്ട് മൊബൈൽ ആപ്പുകൾ ആപ്പ് സ്റ്റോറുകളിൽ നിന്ന് നീക്കം ചെയ്യാൻ കേന്ദ്ര സർക്കാർ നിർദേശം നൽകി. യാത്രക്കാരുടെയും ഡ്രൈവർമാരുടെയും സുരക്ഷയെ ബാധിക്കുന്ന ഗുരുതരമായ സാഹചര്യം കണക്കിലെടുത്താണ് നടപടി. 

സോഷ്യൽ മീഡിയയിൽ പ്രചരിച്ച വീഡിയോകളിൽ സഞ്ചരിച്ചുകൊണ്ടിരുന്ന ഇ-റിക്ഷകൾ സ്മാർട്ട്ഫോൺ ആപ്പുകൾ ഉപയോഗിച്ച് പെട്ടെന്ന് നിർത്തുന്നതായി കാണിച്ചിരുന്നു. ഇതോടെ അപകടസാധ്യതയും പൊതുസുരക്ഷാ ആശങ്കകളും ഉയർന്നതിനെ തുടർന്ന് കേന്ദ്ര ഇലക്ട്രോണിക്സ്, വിവരസാങ്കേതിക മന്ത്രാലയം (MeitY) വിഷയത്തിൽ ഇടപെടുകയായിരുന്നു. 

ബ്ലൂടൂത്ത് അധിഷ്ഠിത ബാറ്ററി മാനേജ്മെന്റ് സിസ്റ്റവുമായി (BAT-BMS) ബന്ധിപ്പിച്ച് പ്രവർത്തിക്കുന്ന ആപ്പുകളാണ് ദുരുപയോഗം ചെയ്യപ്പെട്ടതെന്നാണ് റിപ്പോർട്ടുകൾ. ബാറ്ററിയുടെ പ്രവർത്തനം നിരീക്ഷിക്കാൻ രൂപകൽപ്പന ചെയ്ത ഈ ആപ്പുകൾ ചിലർ അനധികൃതമായി ഉപയോഗിച്ച് സമീപത്തുള്ള ഇ-റിക്ഷകളുടെ പ്രവർത്തനം തടസപ്പെടുത്തുകയായിരുന്നുവെന്ന് അധികൃതർ വ്യക്തമാക്കി. 

സംഭവത്തെ തുടർന്ന് ബന്ധപ്പെട്ട രണ്ട് ആപ്പുകളും പ്രധാന ആപ്പ് സ്റ്റോറുകളിൽ നിന്ന് നീക്കം ചെയ്തതായി കേന്ദ്ര സർക്കാർ അറിയിച്ചു. ഉപയോക്താക്കൾക്ക് അപകടസാധ്യത സൃഷ്ടിക്കാവുന്ന ആപ്പുകൾ ലഭ്യമാകാതിരിക്കാൻ ആപ്പ് സ്റ്റോറുകളും കൂടുതൽ ജാഗ്രത പാലിക്കണമെന്ന് കേന്ദ്രം നിർദേശിച്ചിട്ടുണ്ട്. 

ഇ-റിക്ഷകളിൽ ഉപയോഗിക്കുന്ന ഡിജിറ്റൽ സംവിധാനങ്ങളുടെ സൈബർ സുരക്ഷ കൂടുതൽ ശക്തിപ്പെടുത്തേണ്ടതിന്റെ ആവശ്യകതയും ഈ സംഭവം ചൂണ്ടിക്കാട്ടുന്നുണ്ട്. സംഭവത്തിന്റെ പശ്ചാത്തലത്തിൽ കൂടുതൽ പരിശോധനകളും സുരക്ഷാ നടപടികളും സർക്കാർ തുടരുകയാണ്.