പമ്പുകളിൽ ഇനി ശുദ്ധ പെട്രോൾ ലഭിക്കില്ല; ഇ20 മാത്രം തുടരാൻ കാരണം വ്യക്തമാക്കി കേന്ദ്രം

രാജ്യത്തെ പെട്രോൾ പമ്പുകളിൽ ഇനിമുതൽ ശുദ്ധ പെട്രോൾ (E0) അല്ലെങ്കിൽ കുറഞ്ഞ എഥനോൾ മിശ്രിതമുള്ള പെട്രോൾ പ്രത്യേകമായി ലഭ്യമാക്കുന്നത് പ്രായോഗികമല്ലെന്ന് കേന്ദ്ര സർക്കാർ വ്യക്തമാക്കി. നിലവിൽ രാജ്യവ്യാപകമായി ഇ20 (20 ശതമാനം എഥനോൾ കലർന്ന പെട്രോൾ) ആണ് സ്റ്റാൻഡേർഡ് ഇന്ധനമെന്നും ഇത് തുടരുമെന്നും സർക്കാർ അറിയിച്ചു.

പെട്രോൾ പമ്പുകളിൽ ഇ20, ഇ10, ശുദ്ധ പെട്രോൾ എന്നിങ്ങനെ വ്യത്യസ്ത ഇന്ധനങ്ങൾ ഒരേസമയം വിതരണം ചെയ്യാൻ പ്രത്യേക സംഭരണ ടാങ്കുകളും വിതരണ സംവിധാനങ്ങളും ആവശ്യമായി വരും. ഇത് പ്രവർത്തനപരമായും സാമ്പത്തികമായും പ്രായോഗികമല്ലെന്നാണ് കേന്ദ്രത്തിന്റെ വിശദീകരണം. കൂടാതെ ഇ20 ഇന്ധനത്തിന് ഉയർന്ന ഒക്ടെയ്ൻ നിലവാരമുള്ളതിനാൽ മികച്ച ദഹനം, മെച്ചപ്പെട്ട എൻജിൻ പ്രകടനം, കുറഞ്ഞ മലിനീകരണം എന്നിവ ലഭിക്കുമെന്നും സർക്കാർ ചൂണ്ടിക്കാട്ടി.

ഇ20 ഇന്ധനവുമായി ബന്ധപ്പെട്ട മൈലേജ്, എൻജിൻ സുരക്ഷ, വില തുടങ്ങിയ ആശങ്കകൾക്കും കേന്ദ്രം മറുപടി നൽകിയിട്ടുണ്ട്. പുതിയ വാഹനങ്ങളിൽ ഇ20 ഉപയോഗിക്കുന്നത് സുരക്ഷിതമാണെന്നും, പഴയ വാഹനങ്ങളിൽ ചില സാഹചര്യങ്ങളിൽ ചെറിയ തോതിലുള്ള മൈലേജ് കുറവ് അനുഭവപ്പെടാമെങ്കിലും ഗുരുതരമായ എൻജിൻ തകരാറുകൾക്ക് തെളിവില്ലെന്നുമാണ് സർക്കാർ നിലപാട്. എഥനോൾ മിശ്രിതം വർധിപ്പിക്കുന്നതിലൂടെ അസംസ്കൃത എണ്ണയുടെ ഇറക്കുമതി കുറയ്ക്കാനും കാർബൺ പുറന്തള്ളൽ നിയന്ത്രിക്കാനും കർഷകർക്ക് കൂടുതൽ വരുമാനം ഉറപ്പാക്കാനുമാണ് പദ്ധതിയെന്നും കേന്ദ്രം വ്യക്തമാക്കി.