വ്യാജ പിസ ഓർഡറിന്റെ കെണിയിൽ കുടുങ്ങി മരണം; അമേരിക്കയിൽ തെലങ്കാന സ്വദേശിയെ വെടിവെച്ച് കൊന്നു

ഹൈദരാബാദ്/ഫിലഡൽഫിയ: അമേരിക്കയിലെ ഫിലഡൽഫിയയിൽ പിസ ഡെലിവറിക്കിടെ തെലങ്കാന സ്വദേശിയായ 28-കാരൻ അൻഷുൽ കുഞ്ച വെടിയേറ്റ് കൊല്ലപ്പെട്ടു. വ്യാജ പിസ ഓർഡറിലൂടെ ആളൊഴിഞ്ഞ സ്ഥലത്തേക്ക് വിളിച്ചുവരുത്തി നടത്തിയ ആക്രമണമാണിതെന്നാണ് കുടുംബത്തിന്റെ ആരോപണം. സംഭവം ഇന്ത്യൻ സമൂഹത്തിൽ വലിയ ആശങ്കയ്ക്കിടയാക്കിയിട്ടുണ്ട്. 

ഫിലഡൽഫിയയിലെ റെയ്മണ്ട് റോസൻ ഹോംസ് ഹൗസിങ് കോംപ്ലക്സിലെ ഒരു ഒഴിഞ്ഞ ഫ്ലാറ്റിലേക്കാണ് അൻഷുലിന് ഡെലിവറി ഓർഡർ ലഭിച്ചത്. രാത്രി 12.30 ഓടെ പിസ വിതരണം പൂർത്തിയാക്കിയ ശേഷം അദ്ദേഹത്തിന് നേരെ അജ്ഞാതർ വെടിയുതിർക്കുകയായിരുന്നുവെന്ന് പൊലീസ് അറിയിച്ചു. തലയിൽ വെടിയേറ്റ അൻഷുലിനെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. 

സംഭവസ്ഥലത്ത് കണ്ടെത്തിയ പിസ ബോക്സുകൾ സ്പർശിക്കപ്പെട്ടിട്ടില്ലായിരുന്നുവെന്നും ഡെലിവറി നൽകിയ വിലാസം ഒഴിഞ്ഞുകിടക്കുന്ന യൂണിറ്റായിരുന്നുവെന്നും അന്വേഷണത്തിൽ വ്യക്തമായി. ഇത് മുൻകൂട്ടി ആസൂത്രണം ചെയ്ത കെണിയായിരിക്കാമെന്നാണ് അന്വേഷണ ഉദ്യോഗസ്ഥരുടെ നിഗമനം. ഓർഡർ നൽകിയ ഫോൺ നമ്പർ പൊലീസ് കണ്ടെത്തിയിട്ടുണ്ടെന്നും അതിന്റെ അടിസ്ഥാനത്തിൽ അന്വേഷണം പുരോഗമിക്കുകയാണെന്നും അധികൃതർ അറിയിച്ചു. 

അൻഷുലിന്റെ സഹോദരി തൻവി കുഞ്ച, ഇത് ഒരു "ട്രാപ്പ്" ആയിരുന്നുവെന്ന് ആരോപിച്ചു. "ആളൊഴിഞ്ഞ സ്ഥലത്തേക്ക് പിസ എത്തിക്കാൻ ആവശ്യപ്പെട്ടു. പിന്നീട് അത് വ്യാജ ഓർഡറാണെന്ന് മനസ്സിലായി. അവിടെ ആരുമുണ്ടായിരുന്നില്ല. എന്റെ സഹോദരനെ കൊല്ലാൻ വേണ്ടി ഒരുക്കിയ കെണിയായിരുന്നു അത്," എന്ന് അവർ മാധ്യമങ്ങളോട് പറഞ്ഞു. 

തെലങ്കാനയിലെ മെഡ്ചൽ-മൽക്കാജ്ഗിരി ജില്ലയിലെ ഗുണ്ട്ലപ്പോചംപള്ളി സ്വദേശിയായ അൻഷുൽ നാല് വർഷത്തോളമായി അമേരിക്കയിൽ താമസിക്കുകയായിരുന്നു. പഠനം പൂർത്തിയാക്കിയ ശേഷം ഒരു സ്വകാര്യ കമ്പനിയിൽ ജോലി ചെയ്തിരുന്ന അദ്ദേഹം അധിക വരുമാനത്തിനായി വാരാന്ത്യങ്ങളിൽ പിസ ഡെലിവറി ജോലിയും ചെയ്തിരുന്നു. 

സംഭവത്തിൽ ഇതുവരെ ആരെയും അറസ്റ്റ് ചെയ്തിട്ടില്ല. അതേസമയം, ന്യൂയോർക്കിലെ ഇന്ത്യൻ കോൺസുലേറ്റ് അൻഷുലിന്റെ കുടുംബവുമായി ബന്ധപ്പെടുകയും എല്ലാ സഹായങ്ങളും നൽകുമെന്ന് അറിയിക്കുകയും ചെയ്തു. മൃതദേഹം എത്രയും വേഗം ഇന്ത്യയിലെത്തിക്കണമെന്ന ആവശ്യവുമായി കുടുംബം രംഗത്തെത്തിയിട്ടുണ്ട്. 

അമേരിക്കയിലെ ഇന്ത്യൻ വിദ്യാർഥികളുടെയും പ്രവാസികളുടെയും സുരക്ഷയെക്കുറിച്ചുള്ള ചർച്ചകൾക്കിടയിലാണ് ഈ ദാരുണ സംഭവം നടന്നിരിക്കുന്നത്. അൻഷുലിന്റെ മരണത്തിൽ തെലങ്കാനയിലും അമേരിക്കയിലെ ഇന്ത്യൻ സമൂഹത്തിനിടയിലും വ്യാപക ദുഃഖം രേഖപ്പെടുത്തപ്പെടുകയാണ്.