എടിഎമ്മിൽ നിന്ന് പണം ലഭിച്ചില്ല, അക്കൗണ്ടിൽ നിന്ന് ₹10,000 പോയി

എടിഎമ്മിൽ നിന്ന് പണം പിൻവലിക്കാൻ ശ്രമിച്ചപ്പോൾ അക്കൗണ്ടിൽ നിന്ന് ₹10,000 ഡെബിറ്റ് ചെയ്തെങ്കിലും പണം ലഭിക്കാത്ത സംഭവത്തിൽ ബാങ്കിന് കനത്ത തിരിച്ചടി. ഇടപാട് പരാജയപ്പെട്ടതിന് പിന്നാലെ തുക തിരിച്ചുനൽകുന്നതിൽ ബാങ്ക് വീഴ്ച വരുത്തിയതിനെ തുടർന്നാണ് ഉപഭോക്തൃ കമ്മീഷൻ നഷ്ടപരിഹാരവും നിയമനടപടി ചെലവുകളും ഉൾപ്പെടെ ₹59,600 നൽകാൻ ഉത്തരവിട്ടത്.

ഡൽഹിയിലെ ജഹാംഗീർപുരി സ്വദേശിനിയായ ചന്ദയാണ് പരാതിക്കാരി. 2022 മേയ് 26ന് യൂണിയൻ ബാങ്ക് ഓഫ് ഇന്ത്യയുടെ എടിഎമ്മിൽ നിന്ന് ₹10,000 പിൻവലിക്കാൻ ശ്രമിച്ചെങ്കിലും പണം ലഭിച്ചില്ല. എന്നാൽ അക്കൗണ്ടിൽ നിന്ന് തുക ഡെബിറ്റ് ചെയ്യപ്പെട്ടു. തുടർന്ന് ബാങ്കിൽ പരാതി നൽകിയിട്ടും മാസങ്ങളോളം തുക തിരിച്ചുകിട്ടിയില്ലെന്നാണ് പരാതി.

പരാജയപ്പെട്ട എടിഎം ഇടപാടിലെ തുക സമയബന്ധിതമായി തിരിച്ചുനൽകേണ്ട ഉത്തരവാദിത്വം ബാങ്കിനുണ്ടെന്ന് കമ്മീഷൻ ചൂണ്ടിക്കാട്ടി. ആർബിഐയുടെ പരാജയപ്പെട്ട എടിഎം ഇടപാടുകളുമായി ബന്ധപ്പെട്ട മാർഗനിർദേശങ്ങൾ ഉപഭോക്താക്കളുടെ പണം വേഗത്തിൽ തിരിച്ചുനൽകുന്നതിനൊപ്പം ബാങ്കുകളുടെ ഉത്തരവാദിത്വം ഉറപ്പാക്കുന്നതിനുമുള്ളതാണെന്നും കമ്മീഷൻ വ്യക്തമാക്കി. 

ബാങ്കിന്റെ സേവനത്തിലെ വീഴ്ചയും പരാതി പരിഹരിക്കുന്നതിലെ കാലതാമസവും പരിഗണിച്ചാണ് ഉപഭോക്താവിന് അനുകൂലമായ ഉത്തരവ് വന്നത്. എടിഎമ്മിൽ പണം ലഭിക്കാതിരുന്നിട്ടും അക്കൗണ്ടിൽ നിന്ന് തുക പോയാൽ ഉടൻ ബാങ്കിൽ പരാതി രജിസ്റ്റർ ചെയ്ത് പരാതി നമ്പർ സൂക്ഷിക്കേണ്ടതിന്റെ പ്രാധാന്യവും ഈ സംഭവം വ്യക്തമാക്കുന്നു. 

ഇത്തരം ഇടപാടുകളിൽ ഉപഭോക്താക്കൾക്ക് ബാങ്കിന്റെ പരാതി പരിഹാര സംവിധാനത്തിലൂടെയും ആവശ്യമായാൽ ആർബിഐയുടെ പരാതിപരിഹാര സംവിധാനത്തിലൂടെയും തുടർനടപടി സ്വീകരിക്കാനാകും.