ദുർഗാപൂജ 2026 പ്രതിസന്ധിയിൽ? ഗംഗാതീര മണ്ണ് ക്ഷാമത്തിൽ ആശങ്കയുമായി വിഗ്രഹ നിർമ്മാതാക്കൾ
Jun 13, 2026, 17:01 IST
കൊൽക്കത്ത: പശ്ചിമ ബംഗാളിലെ ഏറ്റവും വലിയ ഉത്സവമായ ദുർഗാപൂജയ്ക്ക് മാസങ്ങൾ മാത്രം ബാക്കി നിൽക്കേ, കൊൽക്കത്തയിലെ പ്രശസ്ത വിഗ്രഹ നിർമാണ കേന്ദ്രമായ കുമാർട്ടുലിയിൽ മണ്ണ് ക്ഷാമം രൂക്ഷമാകുന്നു. ഗംഗാതീരങ്ങളിൽ നിന്ന് മണ്ണ് ശേഖരിക്കുന്നതിനെതിരായ കർശന നടപടികളാണ് പ്രതിസന്ധിക്ക് കാരണമായതെന്നാണ് വിഗ്രഹ നിർമ്മാതാക്കളുടെ ആരോപണം.
അനധികൃത മണ്ണെടുപ്പിനെതിരെ പുതിയ ബിജെപി സർക്കാർ ശക്തമായ നടപടി സ്വീകരിച്ചതോടെ ഗംഗാതീരങ്ങളിൽ നിന്ന് മണ്ണ് ശേഖരിക്കുന്നതിൽ കടുത്ത നിയന്ത്രണങ്ങൾ ഏർപ്പെടുത്തിയിട്ടുണ്ട്. ലൈസൻസുള്ളവർക്ക് മാത്രമാണ് മണ്ണ് എടുക്കാൻ അനുമതിയുള്ളതെങ്കിലും, പ്രായോഗികമായി വിതരണം നിലച്ചിരിക്കുകയാണെന്ന് കരകൗശല തൊഴിലാളികൾ പറയുന്നു.
ദുർഗാ വിഗ്രഹ നിർമാണത്തിന് ആവശ്യമായ പ്രത്യേക തരം പശിമയുള്ള മണ്ണിന്റെ ലഭ്യത കുറഞ്ഞതോടെ നിർമാണ പ്രവർത്തനങ്ങൾ മന്ദഗതിയിലായിരിക്കുകയാണ്. നിരവധി ശിൽപ്പികൾ ഇതിനകം വിഗ്രഹങ്ങളുടെ അടിസ്ഥാന ഘടനകൾ ഒരുക്കിയിട്ടുണ്ടെങ്കിലും മണ്ണ് ലഭിക്കാത്തതിനാൽ തുടർ ജോലികൾ തടസപ്പെട്ടിരിക്കുകയാണ്.
പ്രതിസന്ധിക്കെതിരെ കുമാർട്ടുലിയിലെ ശിൽപ്പികൾ പ്രതിഷേധ റാലിയും സംഘടിപ്പിച്ചു. മണ്ണ് വിതരണം ഉടൻ പുനഃസ്ഥാപിക്കണമെന്നും ആയിരക്കണക്കിന് കുടുംബങ്ങളുടെ ഉപജീവനം സംരക്ഷിക്കണമെന്നും അവർ സർക്കാരിനോട് ആവശ്യപ്പെട്ടു.
അതേസമയം, കർശന രേഖാപരിശോധന, ചരക്ക് വാഹനങ്ങളുടെ നിരീക്ഷണം, വിതരണ ശൃംഖലയിലെ നിയന്ത്രണങ്ങൾ എന്നിവയും അസംസ്കൃത വസ്തുക്കളുടെ ലഭ്യതയെ ബാധിക്കുന്നതായി റിപ്പോർട്ടുകളുണ്ട്. ഇതുമൂലം വർക്ക്ഷോപ്പുകളിൽ പൂർത്തിയാകാത്ത വിഗ്രഹങ്ങളുടെ എണ്ണം വർധിക്കുകയാണ്.
ദുർഗാപൂജ ബംഗാളിന്റെ സാംസ്കാരിക ജീവിതത്തിന്റെയും സമ്പദ്വ്യവസ്ഥയുടെയും പ്രധാന ഘടകമായതിനാൽ, മണ്ണ് ക്ഷാമം വേഗത്തിൽ പരിഹരിക്കപ്പെടാത്ത പക്ഷം ഉത്സവ ഒരുക്കങ്ങളെയും അനുബന്ധ മേഖലകളിലെ ആയിരക്കണക്കിന് തൊഴിലവസരങ്ങളെയും ബാധിക്കുമെന്നാണ് ആശങ്ക.
