എഞ്ചിൻ തകരാർ; കൊൽക്കത്ത–ചെന്നൈ ഇൻഡിഗോ വിമാനത്തിൽ പൂർണ അടിയന്തരാവസ്ഥ പ്രഖ്യാപിച്ചു

കൊൽക്കത്തയിൽ നിന്ന് ചെന്നൈയിലേക്ക് എത്തിയ ഇൻഡിഗോ വിമാനത്തിൽ ലാൻഡിങ്ങിന് തൊട്ടുമുമ്പ് ഇടത് എൻജിന് തകരാർ സംഭവിച്ചതിനെ തുടർന്ന് ചെന്നൈ വിമാനത്താവളത്തിൽ പൂർണ അടിയന്തരാവസ്ഥ പ്രഖ്യാപിച്ചു. വിമാനം സുരക്ഷിതമായി അടിയന്തര ലാൻഡിങ് നടത്തി. 

ചൊവ്വാഴ്ച രാത്രി ചെന്നൈയിലേക്ക് എത്തുന്നതിനിടെയാണ് വിമാനത്തിന്റെ ഇടത് എൻജിനിൽ സാങ്കേതിക തകരാർ കണ്ടെത്തിയത്. തുടർന്ന് പൈലറ്റ് എയർ ട്രാഫിക് കൺട്രോളിനെ വിവരം അറിയിക്കുകയും വിമാനത്താവളത്തിൽ അടിയന്തര നടപടികൾ സ്വീകരിക്കുകയും ചെയ്തു.

വിമാനം സുരക്ഷിതമായി റൺവേയിൽ ഇറക്കിയതോടെ അടിയന്തര നടപടികൾ പൂർത്തിയാക്കി. വിമാനത്തിലുണ്ടായിരുന്ന യാത്രക്കാരും ജീവനക്കാരും സുരക്ഷിതരാണെന്നാണ് അധികൃതർ അറിയിച്ചത്. സംഭവത്തിൽ ആർക്കും പരിക്കേറ്റതായി റിപ്പോർട്ടില്ല. 

എൻജിൻ തകരാറിന്റെ കൃത്യമായ കാരണം കണ്ടെത്തുന്നതിനായി കൂടുതൽ പരിശോധനകൾ ആരംഭിച്ചിട്ടുണ്ട്.