ഷോപിയാനിൽ അഞ്ച് ദിവസത്തെ ഭീകരവിരുദ്ധ ദൗത്യം; ലഷ്കർ-ഇ-തൊയ്ബ ഭീകരൻ കൊല്ലപ്പെട്ടു
ജമ്മു കശ്മീരിലെ ഷോപിയാൻ ജില്ലയിൽ അഞ്ച് ദിവസമായി തുടരുന്ന ഭീകരവിരുദ്ധ ഓപ്പറേഷനിൽ ലഷ്കർ-ഇ-തൊയ്ബ (LeT) ഭീകരനെ സുരക്ഷാസേന വധിച്ചു. ഷോപിയാൻ സ്പെഷ്യൽ ഓപ്പറേഷൻസ് ഗ്രൂപ്പ് (SOG), ഇന്ത്യൻ സൈന്യത്തിന്റെ റാഷ്ട്രിയ റൈഫിൾസ് (RR), സിആർപിഎഫ് എന്നിവ സംയുക്തമായാണ് ഓപ്പറേഷൻ നടത്തിയത്.
ജൂലൈ 3-ന് മെമന്ദർ മേഖലയിലെ സാന്ദ്രമായ ആപ്പിൾത്തോട്ടങ്ങളിൽ രണ്ട് ഭീകരർ ഒളിച്ചിരിക്കുന്നുവെന്ന രഹസ്യവിവരത്തെ തുടർന്ന് സുരക്ഷാസേന പ്രദേശം വളഞ്ഞ് തിരച്ചിൽ ആരംഭിച്ചിരുന്നു. ഇടയ്ക്കിടെ വെടിവയ്പ്പ് നടന്നെങ്കിലും അഞ്ച് ദിവസത്തെ നീണ്ട ഓപ്പറേഷനൊടുവിലാണ് ഒരാളെ വധിക്കാൻ സാധിച്ചത്.
"You can run, but you can't hide" എന്ന സന്ദേശത്തോടെയാണ് ജമ്മു കശ്മീർ പൊലീസ് ഓപ്പറേഷന്റെ വിജയം സാമൂഹികമാധ്യമങ്ങളിലൂടെ അറിയിച്ചത്. കൊല്ലപ്പെട്ട ഭീകരന്റെ സമീപത്ത് നിന്ന് ആയുധങ്ങളും വെടിക്കോപ്പുകളും കണ്ടെടുത്തതായും അധികൃതർ അറിയിച്ചു.
പ്രദേശത്ത് കൂടുതൽ ഭീകരർ ഒളിച്ചിരിക്കാനുള്ള സാധ്യത കണക്കിലെടുത്ത് തിരച്ചിൽ തുടരുകയാണെന്ന് സുരക്ഷാസേന അറിയിച്ചു.
