ജമ്മു കശ്മീരിൽ സൈനിക വാഹനം മലയിടുക്കിലേക്ക് മറിഞ്ഞ് നാല് സൈനികർ മരിച്ചു

ശ്രീനഗർ: ജമ്മു കശ്മീരിലെ ബന്ദിപ്പോര ജില്ലയിലുണ്ടായ അപകടത്തിൽ സൈനിക ട്രക്ക് മറിഞ്ഞു. നാല് സൈനികർ മരിച്ചു. ഇന്ന് ഉച്ചയ്ക്ക് 2.30 ഓടെ സദർകൂട്ട് പയീൻ ഏരിയയ്ക്ക് സമീപമാണ് അപകടമുണ്ടായതെന്ന് ഉദ്യോഗസ്ഥർ പറഞ്ഞു. റോഡിലെ മഞ്ഞ് അപകടത്തിലേക്ക് നയിച്ചതായാണ് റിപ്പോർട്ട്. മഞ്ഞിൽ വാഹനത്തിൻ്റെ ടയർ തെന്നി മലയിടുക്കിലേക്ക് വീണു.

സുരക്ഷാ ഉദ്യോഗസ്ഥർ ഉൾപ്പെടെയുള്ളവർ ഉടൻ രക്ഷാപ്രവർത്തനം നടത്തി. ജമ്മു കശ്മീർ മേഖലയിലാണ് സൈനിക വാഹനങ്ങൾ ഇത്തരത്തിൽ അപകടത്തിൽപ്പെടുന്നത്. കഴിഞ്ഞ മാസവും സൈനിക വാഹനം മലയിടുക്കിൽ വീണ് അപകടമുണ്ടായി.

ഡിസംബർ 24ന് പൂഞ്ച് ജില്ലയിൽ സൈനിക വാഹനം 350 അടി താഴ്ചയുള്ള മലയിടുക്കിലേക്ക് മറിഞ്ഞ് അഞ്ച് സൈനികർ മരിച്ചു. ജമ്മു കശ്മീരിലെ പൂഞ്ച് ജില്ലയിലെ മെന്ദറിലെ ബൽനോയ് മേഖലയിലാണ് അപകടമുണ്ടായത്. സൈനിക വാഹനം റോഡിൽ നിന്ന് തെന്നി അഗാധമായ തോട്ടിലേക്ക് വീണു.

അപകടസമയത്ത് 18 സൈനികർ വാഹനത്തിൽ ഉണ്ടായിരുന്നു. നിലം ആസ്ഥാനത്ത് നിന്ന് ബൽനോയ് ഘോര പോസ്റ്റിലേക്ക് പോവുകയായിരുന്നു വാഹനം. 11 മറാഠാ ലൈറ്റ് ഇൻഫൻട്രിയുടെ വാഹനമാണ് അപകടത്തിൽപ്പെട്ടത്. 2024 നവംബർ 4 ന് രജൗരി ജില്ലയിൽ അവരുടെ വാഹനം റോഡിൽ നിന്ന് തെന്നി മലയിടുക്കിലേക്ക് വീണതിനെത്തുടർന്ന് ഒരു സൈനിക ഉദ്യോഗസ്ഥൻ മരിക്കുകയും മറ്റൊരാൾക്ക് പരിക്കേൽക്കുകയും ചെയ്തു.