പൂനെയിൽ കനത്ത മഴയ്ക്ക് പിന്നാലെ മാലിന്യക്കൂമ്പാരം ഇടിഞ്ഞുവീണു

മഹാരാഷ്ട്രയിലെ പൂനെയിലെ പിംപ്രി-ചിഞ്ച്‌വാഡിലെ മോശി മേഖലയിലുള്ള മാലിന്യ സംസ്കരണ കേന്ദ്രത്തിൽ കനത്ത മഴയെ തുടർന്ന് വലിയ മാലിന്യക്കൂമ്പാരം ഇടിഞ്ഞുവീണ് സമീപത്തെ മൂന്ന് നില കെട്ടിടം തകർന്നു. സംഭവത്തിൽ കുറഞ്ഞത് 16 പേർ കെട്ടിടത്തിനുള്ളിൽ കുടുങ്ങിയതായി ആശങ്കയുണ്ട്. 

മാലിന്യ സംസ്കരണ പദ്ധതിയുടെ ഭരണകാര്യ ഓഫീസായി ഉപയോഗിച്ചിരുന്ന കെട്ടിടമാണ് തകർന്നത്. തുടർച്ചയായ മഴ മൂലം മാലിന്യക്കൂമ്പാരം ദുർബലമാകുകയും പിന്നീട് കെട്ടിടത്തിന് മുകളിലേക്ക് പതിക്കുകയുമായിരുന്നു എന്നാണ് പ്രാഥമിക നിഗമനം. 

ദേശീയ ദുരന്തനിവാരണ സേന (NDRF), അഗ്നിരക്ഷാസേന, പൊലീസ്, പ്രാദേശിക ഭരണകൂടം എന്നിവയുടെ നേതൃത്വത്തിൽ രക്ഷാപ്രവർത്തനം പുരോഗമിക്കുകയാണ്. മണ്ണും അവശിഷ്ടങ്ങളും നീക്കം ചെയ്ത് കുടുങ്ങിയവരെ പുറത്തെടുക്കാനുള്ള ശ്രമം തുടരുകയാണെന്ന് അധികൃതർ അറിയിച്ചു. 

കനത്ത മഴ തുടരുന്നതിനാൽ പ്രദേശത്ത് കൂടുതൽ അപകടസാധ്യതയുണ്ടെന്ന് മുന്നറിയിപ്പ് നൽകിയ അധികൃതർ രക്ഷാപ്രവർത്തനങ്ങൾ അതീവ ജാഗ്രതയോടെയാണ് നടത്തുന്നത്. അപകടത്തിന്റെ കാരണം സംബന്ധിച്ച് വിശദമായ അന്വേഷണം ആരംഭിച്ചിട്ടുണ്ട്.