ഹോർമുസ് ആക്രമണത്തിൽ ഇന്ത്യൻ നാവികൻ കൊല്ലപ്പെട്ടു

ഹോർമുസ് കടലിടുക്കിൽ യുഎഇയുടെ പതാകയുള്ള എണ്ണക്കപ്പലുകൾക്ക് നേരെയുണ്ടായ മിസൈൽ ആക്രമണത്തിൽ ഒരു ഇന്ത്യൻ നാവികൻ കൊല്ലപ്പെട്ടതിനെ തുടർന്ന് ഇന്ത്യ ഇറാന്റെ മുതിർന്ന നയതന്ത്ര പ്രതിനിധികളെ വിദേശകാര്യ മന്ത്രാലയത്തിലേക്ക് വിളിപ്പിച്ച് ശക്തമായ പ്രതിഷേധം അറിയിച്ചു. 

ആക്രമണത്തിൽ ഒരു ഇന്ത്യൻ ജീവനക്കാരൻ മരിക്കുകയും നിരവധി ഇന്ത്യൻ നാവികർക്ക് പരിക്കേൽക്കുകയും ചെയ്തതായി ഔദ്യോഗിക വിവരങ്ങൾ വ്യക്തമാക്കുന്നു. സംഭവത്തെക്കുറിച്ച് വിശദീകരണം തേടിയ ഇന്ത്യ, ഇന്ത്യൻ പൗരന്മാരുടെയും വാണിജ്യ കപ്പലുകളുടെയും സുരക്ഷ ഉറപ്പാക്കണമെന്ന് ഇറാനോട് ആവശ്യപ്പെട്ടു. 

ഹോർമുസ് കടലിടുക്ക് ലോകത്തിലെ ഏറ്റവും നിർണായകമായ എണ്ണക്കടത്ത് പാതകളിലൊന്നാണ്. അമേരിക്ക–ഇറാൻ സംഘർഷം രൂക്ഷമായ സാഹചര്യത്തിൽ ഈ മേഖലയിലെ വ്യാപാര കപ്പലുകൾക്കും നാവികർക്കും നേരെയുള്ള ഭീഷണി വർധിച്ചിരിക്കുകയാണ്.