ഇന്ത്യയുടെ ആദ്യ ഹൈഡ്രജൻ ഫ്യുവൽ സെൽ ട്രെയിൻ; അകത്തെ കാഴ്ചകൾ പുറത്ത്

ഇന്ത്യയുടെ ആദ്യ തദ്ദേശീയമായി വികസിപ്പിച്ച ഹൈഡ്രജൻ ഫ്യുവൽ സെൽ ട്രെയിന്റെ അകത്തെ ദൃശ്യങ്ങൾ പുറത്തുവന്നു. പരിസ്ഥിതി സൗഹൃദ റെയിൽ ഗതാഗതത്തിലേക്കുള്ള രാജ്യത്തിന്റെ സുപ്രധാന ചുവടുവയ്പ്പായാണ് ഈ ട്രെയിനെ വിലയിരുത്തുന്നത്. 

ഹരിയാനയിലെ ജിന്ദ്–സോനിപത് റൂട്ടിലാണ് ട്രെയിൻ സർവീസ് ആരംഭിച്ചിരിക്കുന്നത്. ഹൈഡ്രജൻ ഫ്യുവൽ സെൽ സാങ്കേതികവിദ്യ ഉപയോഗിച്ച് വൈദ്യുതി ഉൽപ്പാദിപ്പിക്കുന്ന ഈ ട്രെയിനിൽ നിന്നുള്ള പ്രധാന പുറന്തള്ളൽ ജലബാഷ്പം മാത്രമാണ്. ഇതിലൂടെ കാർബൺ പുറന്തള്ളൽ ഗണ്യമായി കുറയ്ക്കാനാകുമെന്നാണ് അധികൃതരുടെ വിലയിരുത്തൽ. 

രണ്ട് ഹൈഡ്രജൻ പവർ കാറുകളും എട്ട് യാത്രാ കോച്ചുകളും ഉൾപ്പെടുന്ന ട്രെയിനിന് ഏകദേശം 2,600 യാത്രക്കാരെ വരെ വഹിക്കാനാകും. മണിക്കൂറിൽ 75 കിലോമീറ്റർ വരെ വേഗത കൈവരിക്കാനും ട്രെയിനിന് കഴിയും. ആധുനിക യാത്രാസൗകര്യങ്ങളും സുരക്ഷാ സംവിധാനങ്ങളും കോച്ചുകളിൽ ഒരുക്കിയിട്ടുണ്ട്.