ഇന്ത്യ–യുഎസ് ബഹിരാകാശ സഹകരണം; ബെംഗളൂരു സ്പേസ് എക്സ്പോയിൽ യുഎസ് പവിലിയൻ തുറന്ന് സെർജിയോ ഗോർ

ബെംഗളൂരു: ബെംഗളൂരു സ്പേസ് എക്സ്പോ 2026-ൽ യുഎസ് പവിലിയൻ ഉദ്ഘാടനം ചെയ്ത് ഇന്ത്യ–യുഎസ് ബഹിരാകാശ സഹകരണം കൂടുതൽ ശക്തമാക്കണമെന്ന് ഇന്ത്യയിലെ യുഎസ് അംബാസഡർ സെർജിയോ ഗോർ. സഹകരണം എന്നതിൽ നിന്ന് ‘കോ-ക്രിയേഷൻ’ എന്ന പുതിയ ഘട്ടത്തിലേക്ക് ഇരുരാജ്യങ്ങളുടെയും ബഹിരാകാശ പങ്കാളിത്തം മാറുകയാണെന്ന് അദ്ദേഹം പറഞ്ഞു. 

ബഹിരാകാശ സാങ്കേതികവിദ്യയിൽ സംയുക്തമായി ഉപകരണങ്ങൾ രൂപകൽപ്പന ചെയ്യുകയും സ്റ്റാർട്ടപ്പുകൾക്ക് പിന്തുണ നൽകുകയും ഭാവിയിലെ ബഹിരാകാശ ദൗത്യങ്ങൾ ഒരുമിച്ച് വികസിപ്പിക്കുകയും ചെയ്യുകയാണ് ലക്ഷ്യമെന്ന് ഗോർ വ്യക്തമാക്കി.

ബെംഗളൂരു സ്പേസ് എക്സ്പോയിൽ സംസാരിക്കവെ, അമേരിക്കയുടെ സ്വകാര്യ മൂലധനവും വാണിജ്യ മേഖലയിലെ പരിചയസമ്പത്തും ഇന്ത്യയുടെ മികച്ച എൻജിനീയറിങ് കഴിവുകളും ശാസ്ത്ര പ്രതിഭയും ശക്തമായ സ്റ്റാർട്ടപ്പ് മേഖലയുമായി ചേരുന്നത് വലിയ സാധ്യതകൾ സൃഷ്ടിക്കുമെന്നും അദ്ദേഹം പറഞ്ഞു. 

ചന്ദ്രനിലെ ഭാവി ദൗത്യങ്ങളിലും ഇന്ത്യയുടെ പങ്കാളിത്തം പ്രതീക്ഷിക്കുന്നതായി ഗോർ പറഞ്ഞു. നാസയുടെ മൂൺ ബേസ് പദ്ധതിയിൽ ചേരാൻ ഐഎസ്ആർഒയെ ക്ഷണിച്ചിട്ടുണ്ടെന്നും ചന്ദ്രനിൽ ഇന്ത്യയെ അമേരിക്കയ്ക്കൊപ്പം കാണാനാണ് ആഗ്രഹിക്കുന്നതെന്നും അദ്ദേഹം വ്യക്തമാക്കി. 

സെപ്റ്റംബർ 7 മുതൽ 9 വരെ ബെംഗളൂരുവിലാണ് ഒമ്പതാമത് ബെംഗളൂരു സ്പേസ് എക്സ്പോ നടക്കുന്നത്. ഇന്ത്യയിലെയും വിവിധ രാജ്യങ്ങളിലെയും ബഹിരാകാശ ഏജൻസികളും കമ്പനികളും സ്റ്റാർട്ടപ്പുകളും എക്സ്പോയിൽ പങ്കെടുക്കുന്നുണ്ട്.