കേരളത്തിൽ നിന്ന് പുതിയ സർവീസ് പ്രഖ്യാപിച്ച് ഇൻഡിഗോ; തിങ്കൾ, ബുധൻ, വെള്ളി, ഞായർ ദിവസങ്ങളിൽ വിമാനങ്ങൾ

തിരുവനന്തപുരം: ബജറ്റ് എയർലൈൻ ഇൻഡിഗോ കേരളത്തിൽ നിന്ന് പുതിയ ആഭ്യന്തര വിമാന സർവീസ് പ്രഖ്യാപിച്ചു. തിരുവനന്തപുരം അന്താരാഷ്ട്ര വിമാനത്താവളത്തിൽ നിന്ന് ഗുജറാത്തിലെ അഹമ്മദാബാദിലെ സർദാർ പട്ടേൽ വിമാനത്താവളത്തിലേക്ക് സർവീസ് ഉണ്ട്. ആഴ്ചയിൽ നാല് ദിവസം തിരുവനന്തപുരം അഹമ്മദാബാദ് റൂട്ടിൽ സർവീസ് ഉണ്ടാകും. ഡിസംബർ 13 വെള്ളിയാഴ്ച മുതൽ സർവീസ് ആരംഭിക്കും.

തിങ്കൾ, ബുധൻ, വെള്ളി, ഞായർ ദിവസങ്ങളിലാണ് വിമാനം സർവീസ് നടത്തുകയെന്ന് അറിയിച്ചിട്ടുണ്ട്. അഹമ്മദാബാദിൽ നിന്ന് വൈകിട്ട് 4.25ന് പുറപ്പെടുന്ന വിമാനം രാത്രി 7.05ന് തിരുവനന്തപുരത്തെത്തും.

ഇതേ വിമാനം തിരുവനന്തപുരത്ത് നിന്ന് വൈകിട്ട് 7.35ന് പുറപ്പെട്ട് രാത്രി 9.55ന് അഹമ്മദാബാദിലേക്ക് മടങ്ങും. തിരുവനന്തപുരത്ത് നിന്ന് അഹമ്മദാബാദിലേക്കുള്ള ടിക്കറ്റിന് 7,970 രൂപയും നികുതിയും അഹമ്മദാബാദിൽ നിന്ന് തിരുവനന്തപുരത്തേക്ക് മടങ്ങുന്നതിന് 12,916 രൂപയും നികുതിയും നൽകണമെന്ന് ഇൻഡിഗോയുടെ വെബ്‌സൈറ്റിൽ പറയുന്നു.

ഇൻഡിഗോ തിരുവനന്തപുരത്ത് നിന്ന് അഹമ്മദാബാദിലേക്ക് ആദ്യമായാണ് നേരിട്ട് വിമാനം സർവീസ് നടത്തുന്നത്. നേരത്തെ ബെംഗളൂരുവിനും മുംബൈയ്ക്കുമിടയിൽ കണക്ഷൻ ഫ്ലൈറ്റ് വഴി സർവീസ് നടത്തിയിരുന്നു. കേരളത്തിൽ നിന്ന് വിനോദസഞ്ചാരികൾ എത്തുന്ന ഗുജറാത്തിലേക്ക് നേരിട്ട് സർവീസ് ആരംഭിക്കുന്നത് ടൂറിസം മേഖലയ്ക്ക് ഗുണം ചെയ്യുമെന്ന പ്രതീക്ഷയാണ് വിമാനത്താവള അധികൃതർ പങ്കുവെച്ചത്.