ഇൻഡസ് ജലകരാർ: 'പാകിസ്താൻ തകർത്ത യാഥാർഥ്യമാണ് ഇന്ത്യ അംഗീകരിച്ചത്' - വിനയ് ക്വാത്ര

ഇൻഡസ് ജലകരാർ താൽക്കാലികമായി നിർത്തിവയ്ക്കാനുള്ള ഇന്ത്യയുടെ തീരുമാനം പുതിയ സാഹചര്യമൊന്നും സൃഷ്ടിച്ചതല്ലെന്നും, പതിറ്റാണ്ടുകളായി പാകിസ്താൻ തന്നെ കരാറിന്റെ അടിസ്ഥാനമായിരുന്ന വിശ്വാസവും സൗഹൃദവും തകർത്ത യാഥാർഥ്യത്തെ അംഗീകരിച്ചതാണെന്നും അമേരിക്കയിലെ ഇന്ത്യൻ അംബാസഡർ വിനയ് മോഹൻ ക്വാത്ര പറഞ്ഞു. 

1960-ൽ ഒപ്പുവെച്ച ഇൻഡസ് ജലകരാർ പരസ്പര വിശ്വാസത്തിന്റെയും സഹകരണത്തിന്റെയും അടിസ്ഥാനത്തിലായിരുന്നുവെന്ന് ക്വാത്ര പറഞ്ഞു. എന്നാൽ അതിർത്തി കടന്നുള്ള ഭീകരവാദം, ശത്രുതാപരമായ നടപടികൾ, കരാർ നടപ്പാക്കുന്നതിലെ തടസങ്ങൾ എന്നിവയിലൂടെ ആ അടിത്തറ പാകിസ്താൻ തന്നെ ദുർബലമാക്കിയെന്ന് അദ്ദേഹം ആരോപിച്ചു. 

ഭീകരവാദത്തിന്റെ അടിസ്ഥാനസൗകര്യങ്ങൾ ഇല്ലാതാക്കുകയും വിശ്വാസം പുനഃസ്ഥാപിക്കുകയും ചെയ്യാതെ ഇന്ത്യ-പാകിസ്താൻ ബന്ധത്തിൽ പുരോഗതി പ്രതീക്ഷിക്കാനാകില്ലെന്നും ക്വാത്ര വ്യക്തമാക്കി.