'പൗരന്മാരോട് ഒരു ജനാധിപത്യം പ്രതികരിക്കേണ്ടത് ഇങ്ങനെയാണോ?'; ഡൽഹി പൊലീസ് നടപടിയെ വിമർശിച്ച് വിസ്മയ മോഹൻലാൽ

ഡൽഹിയിൽ വിദ്യാർഥി പ്രതിഷേധക്കാർക്കെതിരെ പൊലീസ് നടത്തിയ നടപടിയെ വിമർശിച്ച് നടൻ മോഹൻലാലിന്റെ മകൾ വിസ്മയ മോഹൻലാൽ രംഗത്തെത്തി. ഇൻസ്റ്റഗ്രാം സ്റ്റോറിയിലൂടെ പങ്കുവെച്ച കുറിപ്പിലാണ്, “പൗരന്മാരോട് ഒരു ജനാധിപത്യം പ്രതികരിക്കേണ്ടത് ശരിക്കും ഇങ്ങനെയാണോ?” എന്ന ചോദ്യമുയർത്തിയത്. 

ടിയർ ഗ്യാസും ലാത്തിച്ചാർജും, വിദ്യാർഥികൾക്ക് പരിക്കേറ്റതും, റോഡുകൾ അടച്ചതും, മെട്രോ സ്റ്റേഷനുകൾ അടച്ചതും, വ്യാപക ബാരിക്കേഡുകളും ഉൾപ്പെടെയുള്ള നടപടികളെ പരാമർശിച്ചായിരുന്നു പ്രതികരണം. പ്രതിഷേധക്കാരുടെ ആവശ്യങ്ങളോട് യോജിക്കണമെന്നില്ലെങ്കിലും, പൗരന്മാരുടെ ശബ്ദത്തോടുള്ള മറുപടി സംവാദത്തിനുപകരം അമിത ബലപ്രയോഗമാകുമ്പോൾ ജനാധിപത്യത്തെക്കുറിച്ച് എല്ലാവരും ചിന്തിക്കേണ്ട സമയമാണെന്ന് കുറിപ്പിൽ പറയുന്നു. 

“ഇന്ന് പ്രതിഷേധിക്കുന്നവർ അവർ ആയിരിക്കാം. നാളെ അത് നിങ്ങളോ നിങ്ങളുടെ കുടുംബമോ ആകാം,” എന്നും കുറിപ്പിൽ ചൂണ്ടിക്കാട്ടുന്നു. വിസ്മയയുടെ പ്രതികരണം സമൂഹമാധ്യമങ്ങളിൽ വ്യാപകമായി ചർച്ചയാകുന്നതിനിടെയാണ് ഇത്.