ഐസിസ് ഭീകരർ മോദിയെ ലക്ഷ്യമിട്ട് ബോംബ് സ്‌ഫോടനത്തിന് ഗൂഢാലോചന നടത്തിയെന്ന് കണ്ടെത്തൽ

മുംബൈ: പ്രധാനമന്ത്രി നരേന്ദ്ര മോദിക്കെതിരായ വധഭീഷണിയിൽ നിർണായക കണ്ടെത്തലുമായി പൊലീസ്. രാജസ്ഥാനിലെ അജ്മീറിൽ നിന്നാണ് ഭീഷണി സന്ദേശം വന്നതെന്ന് പോലീസ് അന്വേഷണത്തിൽ കണ്ടെത്തി. ഡിസംബർ ഏഴിനാണ് മുംബൈ ട്രാഫിക് പോലീസിന് ഭീഷണി സന്ദേശം ലഭിച്ചത്. പ്രധാനമന്ത്രിയെ ലക്ഷ്യമിട്ട് രണ്ട് ഐഎസ് ഭീകരർ ബോംബ് സ്‌ഫോടനത്തിന് പദ്ധതിയിട്ടതായി സന്ദേശത്തിൽ പറയുന്നു.

അജ്മീറിൽ നിന്നുള്ള സന്ദേശം വ്യാജമാണെന്നാണ് പോലീസിൻ്റെ നിഗമനം. മദ്യപിച്ചവരിൽ നിന്നോ മാനസിക വിഭ്രാന്തി ഉള്ളവരിൽ നിന്നോ ഉള്ള വ്യാജ ഭീഷണിയാണെന്നാണ് കരുതുന്നത്. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ച് എഫ്ഐആർ ഫയൽ ചെയ്തു.

അന്വേഷണം പുരോഗമിക്കുകയാണെന്ന് പോലീസ് അറിയിച്ചു. സന്ദേശത്തിന് പിന്നിൽ പ്രവർത്തിച്ചവരെ എത്രയും വേഗം നിയമത്തിന് മുന്നിൽ കൊണ്ടുവരുമെന്ന് പ്രതീക്ഷിക്കുന്നു.

മുംബൈ ട്രാഫിക് പോലീസിൻ്റെ ഔദ്യോഗിക വാട്ട്‌സ്ആപ്പ് നമ്പറുകളിലൊന്നിലേക്കാണ് ഭീഷണി സന്ദേശം എത്തിയത്. രണ്ടാഴ്ച മുമ്പ് പ്രധാനമന്ത്രിയെ കൊല്ലുമെന്ന് ഭീഷണിപ്പെടുത്തി ഒരു അജ്ഞാത ഫോൺ സന്ദേശം വന്നിരുന്നു. 34 കാരിയായ സ്ത്രീയാണ് ഇതിന് പിന്നിൽ.

രാജ്യത്തെ ഭരണ സംവിധാനങ്ങളിലുള്ള അതൃപ്തി മൂലമാണ് ഇങ്ങനെ ചെയ്തതെന്നാണ് പോലീസിൻ്റെ പിടിയിലായ യുവതിയുടെ വാദം. നിരവധി പ്രമുഖർ സമാനമായ രീതിയിൽ കൊല്ലപ്പെടുമെന്ന് അടുത്തിടെ മുംബൈ പോലീസിന് സന്ദേശങ്ങൾ ലഭിച്ചിരുന്നു. പ്രധാനമന്ത്രിയുടെ സുരക്ഷയിൽ ആശങ്കപ്പെടേണ്ട സാഹചര്യമില്ലെന്ന് ഡൽഹി വൃത്തങ്ങൾ അറിയിച്ചു.