ജന്തർ മന്തർ പ്രതിഷേധം: മുഖം തിരിച്ചറിയൽ, ബയോമെട്രിക് നിരീക്ഷണത്തിനെതിരെ സുപ്രീം കോടതിയെ സമീപിച്ച് കേരള എംപി

ജന്തർ മന്തറിലെ വിദ്യാർഥി പ്രതിഷേധത്തിനിടെ ഡൽഹി പൊലീസ് മുഖം തിരിച്ചറിയൽ സാങ്കേതികവിദ്യയും ബയോമെട്രിക് നിരീക്ഷണ സംവിധാനങ്ങളും ഉപയോഗിച്ചതിനെ ചോദ്യം ചെയ്ത് കേരളത്തിൽ നിന്നുള്ള സിപിഐ(എം) രാജ്യസഭാ എംപി എ.എ. റഹീം സുപ്രീം കോടതിയെ സമീപിച്ചു. സമാധാനപരമായ പ്രതിഷേധങ്ങളിൽ ഇത്തരത്തിലുള്ള വ്യാപക ബയോമെട്രിക് നിരീക്ഷണം ഭരണഘടനാ വിരുദ്ധമാണെന്ന് പ്രഖ്യാപിക്കണമെന്നും, ഇതിനായി വ്യക്തമായ നിയമം നിലവിൽ വരുന്നതുവരെ ഇത്തരം നടപടികൾ തടയണമെന്നും ഹർജിയിൽ ആവശ്യപ്പെട്ടിട്ടുണ്ട്. 

ഡൽഹി പൊലീസ് പ്രതിഷേധക്കാരുടെയും മാധ്യമപ്രവർത്തകരുടെയും സാധാരണ പൗരന്മാരുടെയും ദൃശ്യങ്ങൾ ശേഖരിച്ച് മുഖം തിരിച്ചറിയൽ സംവിധാനങ്ങൾ, ഡ്രോണുകൾ, പ്രത്യേക നിരീക്ഷണ വാഹനങ്ങൾ എന്നിവ ഉപയോഗിച്ച് നിയമപരമായ അടിസ്ഥാനമില്ലാതെ നിരീക്ഷണം നടത്തിയെന്നാണ് ഹർജിയിലെ ആരോപണം. ശേഖരിച്ച ബയോമെട്രിക് വിവരങ്ങൾ സംരക്ഷിക്കുന്നതും ഉപയോഗിക്കുന്നതും സംബന്ധിച്ച വിവരങ്ങൾ വെളിപ്പെടുത്താനും, ബാധിക്കപ്പെട്ടവർക്ക് അവരുടെ വിവരങ്ങൾ നീക്കം ചെയ്യാൻ സംവിധാനമൊരുക്കാനും ഹർജിയിൽ ആവശ്യപ്പെട്ടിട്ടുണ്ട്.