അപൂർവ ധാതുക്കളുടെ സ്ഥിരമായ വിതരണം തേടി ജപ്പാൻ; ആന്ധ്രാപ്രദേശുമായി സഹകരണം ലക്ഷ്യം

അപൂർവ ധാതുക്കളുടെ (റെയർ എർത്ത് മിനറൽസ്) സ്ഥിരമായ വിതരണം ഉറപ്പാക്കാൻ ആന്ധ്രാപ്രദേശുമായി സഹകരിക്കാൻ ജപ്പാൻ താൽപര്യം പ്രകടിപ്പിച്ചു. ആഗോള വ്യാവസായിക മേഖലയിൽ നിർണായകമായ ഈ ധാതുക്കളുടെ ലഭ്യത ഉറപ്പാക്കുന്നതിനും ചൈനയെ ആശ്രയിക്കുന്നത് കുറയ്ക്കുന്നതിനുമുള്ള ജപ്പാന്റെ നീക്കത്തിന്റെ ഭാഗമായാണ് ചർച്ചകൾ. ആന്ധ്രാപ്രദേശ് മുഖ്യമന്ത്രി എൻ. ചന്ദ്രബാബു നായിഡുവും ജാപ്പനീസ് പ്രതിനിധികളും തമ്മിൽ നടന്ന കൂടിക്കാഴ്ചയിലാണ് വിഷയം ഉന്നയിച്ചത്.

വ്യാവസായിക നിക്ഷേപം, നൈപുണ്യ വികസനം, നിർണായക ധാതുക്കൾ, ഉരുക്ക് വ്യവസായം, ഹരിത ഊർജം തുടങ്ങിയ മേഖലകളിലെ സഹകരണവും ചർച്ചയായി. സംസ്ഥാനത്തെ വിവിധ വ്യവസായങ്ങളിൽ ജോലി ചെയ്യുന്നവർക്ക് നൈപുണ്യ പരിശീലനം നൽകാൻ ജാപ്പനീസ് കമ്പനികൾ സന്നദ്ധത അറിയിച്ചതായും റിപ്പോർട്ടുകളുണ്ട്. അപൂർവ ധാതുക്കളുടെ സ്ഥിരമായ ലഭ്യത ഇന്ത്യയും ജപ്പാനും തമ്മിലുള്ള നിർണായക ധാതു വിതരണ സഹകരണം ശക്തിപ്പെടുത്തുമെന്ന് ജാപ്പനീസ് പ്രതിനിധികൾ വ്യക്തമാക്കി.

ജപ്പാനിലെ പ്രൊട്ടീരിയൽ ഇന്ത്യ ആന്ധ്രാപ്രദേശിലെ ശ്രീ സിറ്റിയിൽ അമോർഫസ് മെറ്റൽ നിർമാണം ആരംഭിക്കാനും പദ്ധതിയിടുന്നുണ്ട്. ഉയർന്ന ശേഷിയുള്ള ട്രാൻസ്ഫോർമറുകളുടെ നിർമാണത്തിൽ ഉപയോഗിക്കുന്ന ഈ വസ്തുവിന്റെ ഉത്പാദനം 2026 ഡിസംബറിൽ ആരംഭിക്കാനാണ് ലക്ഷ്യമിടുന്നത്. സംസ്ഥാന സർക്കാർ നൽകുന്ന വ്യാവസായിക ആനുകൂല്യങ്ങളും പദ്ധതിക്ക് സഹായകമാകും.

ഇലക്ട്രിക് വാഹനങ്ങൾ, കാറ്റാടി വൈദ്യുതി ഉത്പാദനം, ഇലക്ട്രോണിക്സ്, പ്രതിരോധം, എയ്റോസ്പേസ് തുടങ്ങിയ മേഖലകളിൽ അപൂർവ ധാതുക്കൾക്കും അവ ഉപയോഗിച്ചുള്ള കാന്തങ്ങൾക്കും വലിയ പ്രാധാന്യമുണ്ട്. ഇവയുടെ ഖനനം, സംസ്കരണം, ഉത്പാദനം എന്നിവയിൽ ആഭ്യന്തര ശേഷി വർധിപ്പിക്കാനുള്ള ഇന്ത്യയുടെ ശ്രമങ്ങൾക്കിടെയാണ് ജപ്പാന്റെ താൽപര്യം. ആന്ധ്രാപ്രദേശിനെ നിർണായക ധാതുക്കളുടെ പ്രധാന വ്യാവസായിക കേന്ദ്രമാക്കി മാറ്റാനുള്ള സംസ്ഥാനത്തിന്റെ നീക്കത്തിനും ഈ സഹകരണം സഹായകമായേക്കും.