കെപിഎസ്സി ചെയർമാൻ സസ്പെൻഡ്; മകൾ ₹40,000 വാർഷിക കുടുംബവരുമാനം കാണിച്ച് സംവരണം നേടിയെന്ന ആരോപണം
കർണാടക പബ്ലിക് സർവീസ് കമ്മിഷൻ (KPSC) ചെയർമാൻ ശിവശങ്കരപ്പ എസ്. സഹൂക്കറിനെ ഗവർണർ താൽക്കാലികമായി സസ്പെൻഡ് ചെയ്തു. മക്കളായ രണ്ട് പേരുടെ സർക്കാർ നിയമനത്തിൽ ക്രമക്കേട് നടത്തിയെന്ന ആരോപണവും, അതിൽ ഒരാൾ വാർഷിക കുടുംബവരുമാനം ₹40,000 മാത്രമാണെന്ന് കാണിച്ച് ഒബിസി സംവരണ ആനുകൂല്യം നേടിയെന്ന ഗുരുതര ആരോപണവും ഉയർന്ന പശ്ചാത്തലത്തിലാണ് നടപടി.
ഗവർണറുടെ ഉത്തരവ് പ്രകാരം, ചെയർമാൻ തന്റെ മക്കൾ പങ്കെടുത്ത നിയമന നടപടിയിൽ താൽപര്യസംഘർഷം (conflict of interest) ഉണ്ടായിട്ടും സ്ഥാനത്ത് നിന്ന് വിട്ടുനിൽക്കുകയോ അത് വെളിപ്പെടുത്തുകയോ ചെയ്തില്ലെന്നാണ് ആരോപണം. കൂടാതെ, കർണാടകയിലെ നിലവിലെ സർക്കാർ ഉത്തരവ് പ്രകാരം പബ്ലിക് സർവീസ് കമ്മിഷൻ ചെയർമാന്റെ മക്കൾക്ക് പിന്നാക്ക വിഭാഗ സംവരണ ആനുകൂല്യം ലഭിക്കില്ലെന്നും, ഇത് മറച്ചുവെച്ചാണ് ആനുകൂല്യം നേടിയതെന്നും ആരോപണമുണ്ട്.
സംഭവത്തിൽ ഭരണഘടനയുടെ ആർട്ടിക്കിൾ 317(1) പ്രകാരം അന്വേഷണം നടത്തുന്നതിനായി വിഷയം രാഷ്ട്രപതിയുടെ പരിഗണനയ്ക്ക് വിടാൻ ഗവർണർ ശുപാർശ ചെയ്തിട്ടുണ്ട്. അതുവരെ കമ്മിഷന്റെ മുതിർന്ന അംഗത്തിന് ചെയർമാന്റെ ചുമതല നൽകാനും ഉത്തരവിട്ടു. ആരോപണങ്ങളിൽ നിഷ്പക്ഷവും സ്വതന്ത്രവുമായ അന്വേഷണം ഉറപ്പാക്കുന്നതിനാണ് സസ്പെൻഷൻ നടപടിയെന്ന് ഗവർണറുടെ ഓഫീസ് വ്യക്തമാക്കി.
