ജമ്മു കശ്മീരിൽ മിന്നൽപ്രളയം; ഡോഡ–കിഷ്ത്വാർ ദേശീയപാത തകർന്നു, മണ്ണിടിച്ചിലിൽ വാഹനങ്ങൾ മൂടി

ജമ്മു കശ്മീർ: കനത്ത മഴയെ തുടർന്ന് ജമ്മു കശ്മീരിലെ ഡോഡ, കിഷ്ത്വാർ ജില്ലകളിൽ ഉണ്ടായ മിന്നൽപ്രളയവും മണ്ണിടിച്ചിലും വ്യാപക നാശനഷ്ടമുണ്ടാക്കി. ഡോഡ–കിഷ്ത്വാർ ദേശീയപാതയുടെ (എൻഎച്ച്-244) ഭാഗങ്ങൾ തകർന്നതോടെ ഗതാഗതം പൂർണമായും തടസ്സപ്പെട്ടു. 

പ്രളയജലം വൻതോതിൽ ചെളിയും പാറക്കല്ലുകളും അവശിഷ്ടങ്ങളും ദേശീയപാതയിലേക്ക് ഒഴുകിയെത്തിയതോടെ നിരവധി വാഹനങ്ങൾ മണ്ണിനടിയിൽ കുടുങ്ങി. കിഷ്ത്വാറിലെ നിർമാണത്തിലിരിക്കുന്ന 540 മെഗാവാട്ട് ക്വാർ ജലവൈദ്യുത പദ്ധതിക്ക് സമീപമാണ് ഏറ്റവും കൂടുതൽ നാശനഷ്ടമുണ്ടായതെന്ന് അധികൃതർ അറിയിച്ചു. 

സുരക്ഷാ കാരണങ്ങളാൽ ദേശീയപാതയിലൂടെയുള്ള വാഹനഗതാഗതം താൽക്കാലികമായി നിർത്തിവെച്ചിരിക്കുകയാണ്. റോഡിൽ അടിഞ്ഞുകൂടിയ മണ്ണും പാറക്കല്ലുകളും നീക്കം ചെയ്ത് ഗതാഗതം പുനഃസ്ഥാപിക്കാനുള്ള പ്രവർത്തനങ്ങൾ പുരോഗമിക്കുകയാണെന്ന് അധികൃതർ അറിയിച്ചു. 

കനത്ത മഴ, മിന്നൽപ്രളയം, മണ്ണിടിച്ചിൽ എന്നിവയ്ക്ക് സാധ്യതയുള്ളതിനാൽ അപകടസാധ്യതയുള്ള പ്രദേശങ്ങളിൽ താമസിക്കുന്നവർ അതീവ ജാഗ്രത പാലിക്കണമെന്നും നദികളുടെയും തോടുകളുടെയും സമീപത്തേക്കുള്ള യാത്രകൾ ഒഴിവാക്കണമെന്നും ഭരണകൂടം മുന്നറിയിപ്പ് നൽകി. 

ദുരന്തബാധിത മേഖലകളിൽ രക്ഷാപ്രവർത്തനത്തിനും സ്ഥിതിഗതികൾ നിരീക്ഷിക്കുന്നതിനുമായി ദുരന്തനിവാരണ സേനയെയും മറ്റ് ഏജൻസികളെയും വിന്യസിച്ചിട്ടുണ്ട്. നിലവിൽ ആളപായം റിപ്പോർട്ട് ചെയ്തിട്ടില്ലെങ്കിലും നാശനഷ്ടങ്ങളുടെ കണക്ക് ശേഖരിച്ചുവരികയാണ്.