17,000 അടി ഉയരത്തിൽ ഇൻഡിഗോ വിമാനത്തിൽ മിന്നലാക്രമണം

പട്‌നയിൽ നിന്ന് ലഖ്‌നൗവിലേക്ക് സർവീസ് നടത്തിയ ഇൻഡിഗോ വിമാനത്തിന് 17,000 അടി ഉയരത്തിൽ മിന്നലേറ്റു. മോശം കാലാവസ്ഥയ്ക്കിടെ ഉണ്ടായ സംഭവത്തിൽ വിമാനത്തിന്റെ മുൻഭാഗത്തെ നോസ് റാഡോമിന് കേടുപാടുകൾ സംഭവിച്ചെങ്കിലും വിമാനം സുരക്ഷിതമായി ലഖ്‌നൗ വിമാനത്താവളത്തിൽ ഇറക്കി. 104 യാത്രക്കാരും ആറ് ജീവനക്കാരുമാണ് വിമാനത്തിലുണ്ടായിരുന്നത്. ആർക്കും പരിക്കേറ്റിട്ടില്ല.

ഇൻഡിഗോയുടെ 6E925 വിമാനം ബുധനാഴ്ച ഉച്ചയ്ക്ക് 3.10ന് പട്‌നയിൽ നിന്ന് പുറപ്പെട്ടു. ലഖ്‌നൗവിലേക്ക് ഇറങ്ങുന്നതിനിടെയാണ് ഏകദേശം 17,000 അടി ഉയരത്തിൽ മിന്നലേറ്റത്. പൈലറ്റ് എയർ ട്രാഫിക് കൺട്രോളിനെ സംഭവത്തെക്കുറിച്ച് അറിയിച്ചു. തുടർന്ന് വിമാനം സുരക്ഷിതമായി ലഖ്‌നൗവിൽ ലാൻഡ് ചെയ്തു.

വിമാനം ലാൻഡ് ചെയ്തതിന് ശേഷമാണ് മുൻഭാഗത്ത് കേടുപാടുകൾ സംഭവിച്ചതായി വ്യക്തമായത്. തുടർന്ന് വിമാനം സർവീസിൽ നിന്ന് മാറ്റി വിശദമായ സാങ്കേതിക പരിശോധനയ്ക്കായി ഗ്രൗണ്ട് ചെയ്തു. ഡയറക്ടറേറ്റ് ജനറൽ ഓഫ് സിവിൽ ഏവിയേഷനെ (DGCA) വിവരമറിയിച്ചിട്ടുണ്ടെന്നും എഞ്ചിനീയർമാർ പരിശോധനയും അറ്റകുറ്റപ്പണികളും നടത്തുകയാണെന്നും അധികൃതർ അറിയിച്ചു.

വിമാനം പിന്നീട് ലഖ്‌നൗവിൽ നിന്ന് അഹമ്മദാബാദിലേക്ക് പോകേണ്ടതായിരുന്നു. എന്നാൽ സാങ്കേതിക പരിശോധന ആവശ്യമായതിനാൽ യാത്രക്കാർക്കായി ഇൻഡിഗോ മറ്റൊരു വിമാനം ഏർപ്പെടുത്തി. അതേസമയം, വിമാനത്തിന്റെ മൂക്ക് ഭാഗത്തെ കേടുപാടിന് മിന്നലാക്രമണമാണോ, ആലിപ്പഴമോ മറ്റേതെങ്കിലും വസ്തുവിന്റെ ആഘാതമാണോ കാരണമെന്ന് വിശദമായ പരിശോധനയ്ക്ക് ശേഷമേ സ്ഥിരീകരിക്കാനാകൂവെന്ന് റിപ്പോർട്ടുകൾ വ്യക്തമാക്കുന്നു.