മംഗളൂരുവിനെ പാലക്കാട് റെയിൽവേ ഡിവിഷനിൽ നിന്ന് മാറ്റുന്നു

പാലക്കാട്: മംഗളൂരു റെയിൽവേ മേഖലയെ പാലക്കാട് ഡിവിഷനിൽ നിന്ന് മാറ്റി ദക്ഷിണ പശ്ചിമ റെയിൽവേയുടെ മൈസൂരു ഡിവിഷന് കീഴിലാക്കാൻ റെയിൽവേ ബോർഡ് തീരുമാനിച്ചു. 2026 ഒക്ടോബർ ഒന്നുമുതൽ മാറ്റം പ്രാബല്യത്തിൽ വരും. മംഗളൂരു ഉൾപ്പെടെ ഉളളാൾ വരെയുള്ള പ്രദേശമാണ് പാലക്കാട് ഡിവിഷനിൽ നിന്ന് മാറ്റുന്നത്.

മംഗളൂരു മേഖലയിലെ റെയിൽവേ ഭരണപരമായ നിയന്ത്രണം മൈസൂരു ഡിവിഷന് കീഴിലാകുന്നതോടെ പാലക്കാട് ഡിവിഷന്റെ പ്രവർത്തനപരവും സാമ്പത്തികവുമായ പ്രാധാന്യത്തിൽ കുറവുണ്ടാകുമെന്ന ആശങ്ക ഉയർന്നിട്ടുണ്ട്. മംഗളൂരു സെൻട്രൽ, മംഗളൂരു ജങ്ഷൻ എന്നിവയ്ക്കൊപ്പം മംഗളൂരു തുറമുഖവുമായി ബന്ധപ്പെട്ട ചരക്ക് ഗതാഗതവും മാറ്റത്തിന്റെ പരിധിയിൽ വരും.

റെയിൽവേ ബോർഡിന്റെ തീരുമാനത്തെ മംഗളൂരു എംപി ബ്രിജേഷ് ചൗട്ട സ്വാഗതം ചെയ്തു. എംപിയായി ചുമതലയേറ്റതിന് പിന്നാലെ തന്നെ മംഗളൂരുവിനെ പാലക്കാട് ഡിവിഷനിൽ നിന്ന് മാറ്റണമെന്ന ആവശ്യം മുൻഗണനയായി ഉന്നയിച്ചിരുന്നുവെന്നാണ് അദ്ദേഹത്തിന്റെ അവകാശവാദം.

അതേസമയം, തീരുമാനം മലബാറിലെ റെയിൽ വികസനത്തിന് തിരിച്ചടിയാകുമെന്ന് ചൂണ്ടിക്കാട്ടി കോൺഗ്രസ് എംപി എം.കെ. രാഘവൻ എതിർപ്പ് രേഖപ്പെടുത്തി. മംഗളൂരു മേഖലയിലെ യാത്രാ-ചരക്ക് വരുമാനം പാലക്കാട് ഡിവിഷന് നഷ്ടമാകുമെന്നതാണ് പ്രധാന ആശങ്ക.

മംഗളൂരുവിനെ പാലക്കാട് ഡിവിഷനിൽ നിന്ന് മാറ്റണമെന്ന ആവശ്യവുമായി ബിജെപി നേതാക്കൾ നേരത്തെ നടത്തിയ ഇടപെടലുകൾ ചൂണ്ടിക്കാട്ടിയാണ് ഇപ്പോൾ തീരുമാനത്തിന്റെ ക്രെഡിറ്റ് അവകാശപ്പെടുന്നത്. അതേസമയം, വിഷയത്തിൽ രാഷ്ട്രീയ വാദപ്രതിവാദങ്ങളും ശക്തമായിട്ടുണ്ട്.