ഹാൾദിയ പെട്രോകെമിക്കൽസ് പൈപ്പ്ലൈനിൽ വൻ തീപിടിത്തം
പശ്ചിമ ബംഗാളിലെ കിഴക്കൻ മേദിനിപൂർ ജില്ലയിലെ ഹാൾദിയ പെട്രോകെമിക്കൽസിന്റെ നാഫ്ത പൈപ്പ്ലൈനിൽ ചൊവ്വാഴ്ച പുലർച്ചെയുണ്ടായ വൻ തീപിടിത്തത്തിൽ 20-ലേറെ പേർക്ക് പരിക്കേറ്റു. ഇവരിൽ അഞ്ചുപേരുടെ നില ഗുരുതരമാണെന്ന് അധികൃതർ അറിയിച്ചു.
പുലർച്ചെ ഏകദേശം 2.45-ഓടെയാണ് പൈപ്പ്ലൈനിൽ തീപിടിത്തമുണ്ടായത്. ശക്തമായ സ്ഫോടനശബ്ദത്തെ തുടർന്ന് തീ സമീപത്തെ ചിരഞ്ജിബ്പൂർ മേഖലയിലേക്കും വ്യാപിച്ച് നിരവധി വീടുകൾക്ക് നാശനഷ്ടമുണ്ടാക്കി. കമ്പനി സുരക്ഷാ ജീവനക്കാരുൾപ്പെടെ നിരവധി പേർക്ക് പൊള്ളലേറ്റതായാണ് റിപ്പോർട്ട്.
തീപിടിത്തം നിയന്ത്രണവിധേയമാക്കാൻ 12-ലധികം അഗ്നിശമനസേനാ യൂണിറ്റുകളെ വിന്യസിച്ചു. പരിക്കേറ്റവരെ ഹാൾദിയ സബ്-ഡിവിഷണൽ ആശുപത്രിയിലും പിന്നീട് ഗുരുതരാവസ്ഥയിലുള്ളവരെ കൊൽക്കത്തയിലെ പ്രത്യേക ആശുപത്രികളിലേക്കും മാറ്റി ചികിത്സ തുടരുകയാണ്.
തീപിടിത്തത്തെ തുടർന്ന് സമീപത്തെ റെയിൽവേ ഓവർഹെഡ് വൈദ്യുത സംവിധാനത്തിനും കേടുപാടുകൾ സംഭവിച്ചതിനാൽ ഹാൾദിയ മേഖലയിലെ ട്രെയിൻ സർവീസുകളും തടസ്സപ്പെട്ടു. സുരക്ഷാ മുൻകരുതലുകളുടെ ഭാഗമായി പ്രദേശം പൂർണമായും വളഞ്ഞ് നിയന്ത്രണത്തിലാക്കിയതായി അധികൃതർ അറിയിച്ചു.
നാഫ്ത പൈപ്പ്ലൈനിലുണ്ടായ ചോർച്ചയാണ് തീപിടിത്തത്തിന് കാരണമായതെന്നാണ് പ്രാഥമിക നിഗമനം. എന്നാൽ അപകടത്തിന്റെ യഥാർത്ഥ കാരണം വിശദമായ അന്വേഷണത്തിന് ശേഷമേ വ്യക്തമാകൂ എന്ന് പൊലീസ്, ഹാൾദിയ പെട്രോകെമിക്കൽസ് അധികൃതർ അറിയിച്ചു.
