ചെന്നൈയിൽ പുതിയ നിയമസഭാ–സെക്രട്ടേറിയറ്റ് സമുച്ചയം

തമിഴ്നാട് മുഖ്യമന്ത്രി സി. ജോസഫ് വിജയ് ചെന്നൈയിൽ പുതിയ നിയമസഭാ–സെക്രട്ടേറിയറ്റ് സംയോജിത സമുച്ചയം നിർമ്മിക്കുമെന്ന് പ്രഖ്യാപിച്ചു. ഏകദേശം 20 ലക്ഷം ചതുരശ്ര അടി വിസ്തൃതിയിൽ നിർമിക്കുന്ന പദ്ധതിക്ക് ₹1,200 കോടി ചെലവ് പ്രതീക്ഷിക്കുന്നതായി നിയമസഭയിൽ അറിയിച്ചു.

നിലവിലെ ഫോർട്ട് സെന്റ് ജോർജിൽ കൂടുതൽ വികസനത്തിന് സ്ഥലപരിമിതിയുണ്ടെന്നും സർക്കാർ വകുപ്പുകളുടെ പ്രവർത്തനം ഒരൊറ്റ ആധുനിക സമുച്ചയത്തിലേക്ക് മാറ്റേണ്ടതുണ്ടെന്നും വിജയ് പറഞ്ഞു. പുതിയ കെട്ടിടത്തിൽ എല്ലാ സർക്കാർ വകുപ്പുകൾക്കും ആവശ്യമായ സൗകര്യങ്ങൾ, പാർക്കിങ്, കോൺഫറൻസ് ഹാളുകൾ, പൊതുസേവന കേന്ദ്രങ്ങൾ എന്നിവ ഉൾപ്പെടുത്തും.

ഭിന്നശേഷിക്കാർക്ക് സൗകര്യപ്രദമായ സംവിധാനങ്ങൾ, അഗ്നിസുരക്ഷാ സംവിധാനങ്ങൾ, ഗ്രീൻ ബിൽഡിങ് മാനദണ്ഡങ്ങൾ എന്നിവയും പുതിയ സമുച്ചയത്തിന്റെ ഭാഗമാകും. അതേസമയം, നൂറ്റാണ്ടുകൾ പഴക്കമുള്ള ഫോർട്ട് സെന്റ് ജോർജിലെ ചരിത്രപ്രധാന കെട്ടിടങ്ങൾ പൈതൃക കേന്ദ്രങ്ങളായി സംരക്ഷിക്കുമെന്നും സർക്കാർ വ്യക്തമാക്കി.

ഇതിനൊപ്പം ചെന്നൈയിൽ തമിഴ്നാട് ഒളിമ്പിക് സിറ്റിയും മോട്ടോർ സ്പോർട്സ് സിറ്റിയും സ്ഥാപിക്കുമെന്ന് വിജയ് പ്രഖ്യാപിച്ചു. അന്താരാഷ്ട്ര നിലവാരത്തിലുള്ള റേസിങ് ട്രാക്ക്, പരിശീലന സൗകര്യങ്ങൾ എന്നിവ ഉൾപ്പെടുന്ന മോട്ടോർ സ്പോർട്സ് സിറ്റിയിൽ ഫോർമുല 1 മുതൽ ഫോർമുല 4 വരെയുള്ള മത്സരങ്ങൾ നടത്തുന്നതിനുള്ള സൗകര്യങ്ങൾ ഒരുക്കാനാണ് പദ്ധതി.

യുവ മോട്ടോർ സ്പോർട്സ് താരങ്ങളെ കണ്ടെത്തി പരിശീലിപ്പിക്കുന്നതിനും അന്താരാഷ്ട്ര നിലവാരത്തിലേക്ക് ഉയർത്തുന്നതിനും പദ്ധതി ലക്ഷ്യമിടുന്നു. ടൂറിസം, വാഹനനിർമാണ മേഖല, തൊഴിൽ, സാമ്പത്തിക വളർച്ച എന്നിവയ്ക്കും മോട്ടോർ സ്പോർട്സ് സിറ്റി സഹായകരമാകുമെന്നാണ് സർക്കാരിന്റെ വിലയിരുത്തൽ.