ഈഡൻ ഗാർഡൻസിലെ മഹാലയ ആഘോഷത്തിൽ മോദിയും അമിത് ഷായും പങ്കെടുക്കില്ല

കൊൽക്കത്തയിലെ ഈഡൻ ഗാർഡൻസിൽ ഒക്ടോബർ 10ന് മഹാലയ ദിനത്തിൽ നടക്കുന്ന വൻ ദുർഗാപൂജാ ഉദ്ഘാടന ചടങ്ങിൽ പ്രധാനമന്ത്രി നരേന്ദ്ര മോദിയും കേന്ദ്ര ആഭ്യന്തരമന്ത്രി അമിത് ഷായും പങ്കെടുക്കില്ല. ഇരുവരെയും പരിപാടിയിലേക്ക് ക്ഷണിച്ചിരുന്നെങ്കിലും നിലവിലെ വിവരങ്ങൾ പ്രകാരം ഇരുവരുടെയും സാന്നിധ്യം ഉണ്ടാകില്ല.

മഹാലയ ദിനത്തിൽ ബംഗാളിലെ ദുർഗാപൂജാ ആഘോഷങ്ങൾക്ക് തുടക്കം കുറിക്കുന്നതിനായാണ് ഈഡൻ ഗാർഡൻസിൽ വിപുലമായ പരിപാടി സംഘടിപ്പിക്കുന്നത്. നേരത്തെ പ്രധാനമന്ത്രി മോദി ചടങ്ങിൽ പങ്കെടുക്കുമെന്നും ദുർഗാപൂജാ പരിപാടികൾക്ക് തുടക്കം കുറിക്കുമെന്നും റിപ്പോർട്ടുകളുണ്ടായിരുന്നു.

ഏകദേശം 35,000 പേർ പങ്കെടുക്കുന്ന വൻ പരിപാടിയാണ് ഈഡൻ ഗാർഡൻസിൽ ഒരുക്കുന്നത്. 2,500ഓളം വി.ഐ.പി. അതിഥികൾക്കൊപ്പം ഏകദേശം 6,000 കലാകാരന്മാരുടെയും 3,000ലധികം ധാക്കികളുടെയും കലാപരിപാടികളും ലൈറ്റ് ആൻഡ് സൗണ്ട് ഷോയും ഡ്രോൺ ഷോയും വെടിക്കെട്ടും പരിപാടിയുടെ ഭാഗമാകും.

മോദിയുടെ സാന്നിധ്യത്തെക്കുറിച്ച് നേരത്തെ വലിയ ഒരുക്കങ്ങൾ നടത്തിയിരുന്നെങ്കിലും പിന്നീട് അദ്ദേഹത്തിന്റെ പരിപാടിയിൽ മാറ്റം വരികയായിരുന്നു. അമിത് ഷായും പരിപാടിയിൽ പങ്കെടുക്കില്ലെന്ന വിവരം ഇന്ന് പുറത്തുവന്നതോടെ ഇരുവരുടെയും സാന്നിധ്യത്തെക്കുറിച്ചുള്ള ആഴ്ചകളായുള്ള അഭ്യൂഹങ്ങൾക്കും വിരാമമായി.

അതേസമയം, ദുർഗാപൂജാ ആഘോഷങ്ങളുടെ ഭാഗമായി പ്രധാനമന്ത്രി മോദി പിന്നീട് കൊൽക്കത്ത സന്ദർശിക്കാനുള്ള സാധ്യതയുണ്ടെന്നാണ് റിപ്പോർട്ടുകൾ. സപ്തമി ദിവസത്തെ സന്ദർശനവും അഷ്ടമിക്ക് ബെലൂർ മഠത്തിലെ ചടങ്ങുകളിൽ പങ്കെടുക്കുന്നതും സംബന്ധിച്ച് സൂചനകളുണ്ട്.