ഇന്തോനേഷ്യയുടെ പരമോന്നത ബഹുമതി മോദിക്ക്; വിദേശ രാജ്യങ്ങളിൽ നിന്ന് ലഭിച്ച പുരസ്കാരങ്ങൾ 34 ആയി
ഇന്തോനേഷ്യയുടെ പരമോന്നത ദേശീയ ബഹുമതിയായ 'ബിന്റാങ് റിപ്പബ്ലിക് ഇൻഡോനേഷ്യ അഡിപൂർണ' (Bintang Adipurna) പ്രധാനമന്ത്രി നരേന്ദ്ര മോദിക്ക് സമ്മാനിച്ചു. പ്രസിഡന്റ് പ്രബോവോ സുബിയാന്തോയുടെ സാന്നിധ്യത്തിലായിരുന്നു ബഹുമതി നൽകിയത്. ഇന്ത്യ–ഇന്തോനേഷ്യ ബന്ധം ശക്തിപ്പെടുത്തുന്നതിലും ഉഭയകക്ഷി സഹകരണം വിപുലീകരിക്കുന്നതിലും നൽകിയ സംഭാവനകളെ മാനിച്ചാണ് പുരസ്കാരം.
ഇന്തോനേഷ്യയുടെ ഏറ്റവും ഉയർന്ന ദേശീയ ബഹുമതിയാണിത്. രാജ്യത്തിനും ജനങ്ങൾക്കും അസാധാരണ സേവനം അനുഷ്ഠിച്ച വ്യക്തികൾക്കും വിദേശ നേതാക്കൾക്കും ഈ ബഹുമതി നൽകാറുണ്ട്.
ഈ പുരസ്കാരത്തോടെ വിദേശ രാജ്യങ്ങളിൽ നിന്ന് പ്രധാനമന്ത്രി നരേന്ദ്ര മോദിക്ക് ലഭിച്ച ബഹുമതികളുടെ എണ്ണം 34 ആയി. വിവിധ രാജ്യങ്ങളുമായി ഇന്ത്യയുടെ നയതന്ത്ര ബന്ധം ശക്തിപ്പെടുത്തുന്നതിന്റെ അംഗീകാരമായാണ് കേന്ദ്ര സർക്കാർ ഇതിനെ വിശേഷിപ്പിക്കുന്നത്.
രണ്ടുദിവസത്തെ ഇന്തോനേഷ്യ സന്ദർശനത്തിനിടെയാണ് പുരസ്കാരദാനം നടന്നത്. സന്ദർശനത്തിൽ പ്രതിരോധം, വ്യാപാരം, സമുദ്രസുരക്ഷ, നിർണായക ധാതുക്കൾ തുടങ്ങിയ മേഖലകളിലെ സഹകരണം ശക്തിപ്പെടുത്തുന്നതിനുള്ള ചർച്ചകളും നടന്നു.
