ഇന്ത്യയിലെ ആദ്യത്തെ അണ്ടർവാട്ടർ മെട്രോ പ്രധാനമന്ത്രി മോദി ഉദ്ഘാടനം ചെയ്തു

ന്യൂഡൽഹി: ഹൂഗ്ലി നദിയുടെ അടിത്തട്ടിൽ നിന്ന് 16 മീറ്റർ താഴെ 520 മീറ്റർ നീളത്തിൽ നിർമ്മിച്ച ഇന്ത്യയിലെ ആദ്യത്തെ അണ്ടർവാട്ടർ മെട്രോ ടണൽ പ്രധാനമന്ത്രി നരേന്ദ്ര മോദി ബുധനാഴ്ച കൊൽക്കത്തയിൽ സമർപ്പിച്ചു. ഉദ്ഘാടനത്തിന് ശേഷം പ്രധാനമന്ത്രി സ്‌കൂൾ വിദ്യാർത്ഥികൾക്കൊപ്പം മെട്രോയിൽ യാത്ര ചെയ്തു. എസ്പ്ലനേഡിൽ നിന്ന് ഹൗറയിലേക്കുള്ള യാത്രയിൽ മൈതാനത്ത് പ്രധാനമന്ത്രി മോദി വിദ്യാർത്ഥികളുമായി സംവദിച്ചു.

ഹൂഗ്ലി നദിയുടെ പടിഞ്ഞാറ് ഭാഗത്തുള്ള ഹൗറയെയും കിഴക്കൻ തീരത്തുള്ള സാൾട്ട് ലേക്ക് സിറ്റിയെയും ബന്ധിപ്പിക്കുന്ന കൊൽക്കത്ത മെട്രോയുടെ 16.6 കിലോമീറ്റർ ഇടനാഴിയുടെ ഭാഗമാണ് ഈ എഞ്ചിനീയറിംഗ് വിസ്മയം.

• നദിയുടെ മുകൾ നിരപ്പിൽ നിന്ന് 40 മീറ്റർ താഴെ
• 45 സെക്കൻഡിനുള്ളിൽ മെട്രോ തുരങ്കം കടക്കും.

ഭൂനിരപ്പിൽ നിന്ന് ഏകദേശം 40 മീറ്റർ താഴ്ചയിൽ നിർമ്മിച്ച ഇന്ത്യയിലെ ഏറ്റവും ആഴമേറിയ മെട്രോ സ്റ്റേഷനാണിത്; അത് ഒരു പത്ത് നില കെട്ടിടത്തിൻ്റെ ഉയരത്തിന് തുല്യമാണ്.

• 16.6 കിലോമീറ്റർ കിഴക്ക്-പടിഞ്ഞാറ് മെട്രോ ഇടനാഴി, തുരങ്കം ഉൾപ്പെടെ 10.8 കിലോമീറ്റർ ഭൂഗർഭ പാത.
• പാതയിലെ ആറ് സ്റ്റേഷനുകളിൽ മൂന്നെണ്ണം ഭൂമിക്കടിയിലാണ്.
• നിർമ്മാണം: കൊൽക്കത്ത മെട്രോ റെയിൽ കോർപ്പറേഷൻ.
• 2017ൽ ആരംഭിച്ച നിർമാണം 2021ൽ പൂർത്തിയായി.
• തുരങ്കത്തിലൂടെയുള്ള ആദ്യ പരീക്ഷണ ഓട്ടം 2023 ഏപ്രിലിൽ പൂർത്തിയായി.
• മൊബൈൽ സിഗ്നലും ഇൻ്റർനെറ്റും ടണലിൽ ലഭ്യമാണ്