അടുത്ത മാസം ആന്ധ്രയിലെ ഭോഗാപുരം വിമാനത്താവളം പ്രധാനമന്ത്രി ഉദ്ഘാടനം ചെയ്യും

അമരാവതി: ആന്ധ്രാപ്രദേശിലെ ഭോഗാപുരം അന്താരാഷ്ട്ര വിമാനത്താവളം അടുത്ത മാസം പ്രധാനമന്ത്രി നരേന്ദ്ര മോദി ഉദ്ഘാടനം ചെയ്യും. ഓഗസ്റ്റ് 1-നാണ് ഉദ്ഘാടനച്ചടങ്ങ് നിശ്ചയിച്ചിരിക്കുന്നതെന്ന് മുഖ്യമന്ത്രി എൻ. ചന്ദ്രബാബു നായിഡു അറിയിച്ചു. ഉത്തര ആന്ധ്രയുടെ സാമ്പത്തിക വളർച്ചയ്ക്ക് വലിയ കരുത്താകുന്ന പദ്ധതിയായിരിക്കും ഈ വിമാനത്താവളമെന്നും അദ്ദേഹം പറഞ്ഞു. 

വിശാഖപട്ടണത്തിന് സമീപമുള്ള ഭോഗാപുരത്ത് നിർമിച്ചിരിക്കുന്ന ഈ ഗ്രീൻഫീൽഡ് അന്താരാഷ്ട്ര വിമാനത്താവളം ആഭ്യന്തര-അന്താരാഷ്ട്ര വ്യോമഗതാഗതത്തിന് പുതിയ സാധ്യതകൾ തുറക്കുമെന്നാണ് പ്രതീക്ഷ. വിനോദസഞ്ചാരം, വ്യവസായം, തൊഴിൽ മേഖലകൾക്കും പദ്ധതി വലിയ ഉത്തേജനമാകുമെന്നും സർക്കാർ വിലയിരുത്തുന്നു. 

വിമാനത്താവളത്തിന്റെ നിർമാണ പ്രവർത്തനങ്ങൾ പൂർത്തിയായതായും ആവശ്യമായ ലൈസൻസുകളും അനുമതികളും ലഭിച്ചതായും കേന്ദ്ര വ്യോമയാന മന്ത്രാലയം നേരത്തെ അറിയിച്ചിരുന്നു. ഉദ്ഘാടനത്തിന് പിന്നാലെ വിമാന സർവീസുകൾ ഘട്ടംഘട്ടമായി ആരംഭിക്കുമെന്നാണ് വിവരം.