പ്രധാനമന്ത്രി ദേശീയ യുദ്ധ സ്മാരകം സന്ദർശിച്ചു, പുഷ്പചക്രം അർപ്പിച്ചു, കർതവ്യ പാതയിൽ റിപ്പബ്ലിക് ദിന പരേഡ് ആരംഭിച്ചു

ന്യൂഡൽഹി: ദേശീയ തലസ്ഥാനത്ത് 76-ാമത് റിപ്പബ്ലിക് ദിനാഘോഷത്തിന്റെ ഭാഗമായി പരേഡ് ആരംഭിച്ചു. രാഷ്ട്രപതി ദ്രൗപതി മുർമു, ഉപരാഷ്ട്രപതി ജഗ്ദീപ് ധൻഖർ, പ്രധാനമന്ത്രി നരേന്ദ്ര മോദി, മുഖ്യാതിഥി ഇന്തോനേഷ്യൻ പ്രസിഡന്റ് പ്രബോവോ സുബിയാന്റോ എന്നിവർ ചടങ്ങിൽ പങ്കെടുത്തു.

കർതവ്യ പാതയിൽ പരേഡ് ആരംഭിക്കുന്നതിന് മുമ്പ് പ്രധാനമന്ത്രി നരേന്ദ്ര മോദി ദേശീയ യുദ്ധ സ്മാരകത്തിൽ പുഷ്പചക്രം അർപ്പിച്ചു. തുടർന്ന് അദ്ദേഹം അവിടെ തയ്യാറാക്കിയ ഡിജിറ്റൽ സന്ദർശക ഡയറിയിൽ തന്റെ റിപ്പബ്ലിക് ദിന സന്ദേശം എഴുതി.

റിപ്പബ്ലിക് ദിനാഘോഷത്തിനായി കർതവ്യ പാതയിലെത്തിയ രാഷ്ട്രപതി ത്രിവർണ്ണ പതാകയെ അഭിവാദ്യം ചെയ്തതിന് ശേഷമാണ് പരേഡ് ആരംഭിച്ചത്. 300 കലാകാരന്മാർ പങ്കെടുത്ത സംഗീത കച്ചേരിയോടെയാണ് പരേഡ് ആരംഭിച്ചത്. വിവിധ സംഗീതോപകരണങ്ങളുടെ അകമ്പടിയോടെയാണ് സാംസ്കാരിക വകുപ്പ് കച്ചേരി ഒരുക്കിയത്. 'സ്വർണിം ഭാരത്: വിരാസത് ഔർ വികാസ്' എന്ന വിഷയത്തിൽ 31 ടാബ്ലോകൾ പരേഡിൽ ഉണ്ടാകും.

ചരിത്രത്തിൽ ആദ്യമായി 5,000 കലാകാരന്മാർ പങ്കെടുക്കുന്ന സാംസ്കാരിക പരിപാടികൾ ഉണ്ടാകും. ഏകദേശം 10,000 അതിഥികൾ പരിപാടി കാണാൻ എത്തിയിട്ടുണ്ട്. പരേഡ് 90 മിനിറ്റ് നീണ്ടുനിൽക്കും. 152 അംഗ ഇന്തോനേഷ്യൻ ആർമിയും 190 അംഗ ഇന്തോനേഷ്യൻ മിലിട്ടറി ബാൻഡും പരിപാടിയുടെ ഭാഗമാകും.

പരേഡിനായി ഇന്ത്യൻ സൈന്യം തദ്ദേശീയമായി നിർമ്മിച്ച യുദ്ധ ടാങ്കുകളും സൈനിക വാഹനങ്ങളും തയ്യാറാക്കിയിട്ടുണ്ട്. വ്യോമസേനയുടെ 40 യുദ്ധവിമാനങ്ങൾ ആകാശത്ത് വർണ്ണാഭമായ ഒരു കാഴ്ച സൃഷ്ടിക്കാൻ ഒരുങ്ങിയിരിക്കുന്നു. നാവികസേനയുടെയും വിവിധ അർദ്ധസൈനിക വിഭാഗങ്ങളുടെയും പരേഡ് ഗ്രൂപ്പുകളും പങ്കെടുക്കും.