മൃതദേഹത്തിന്റെ ഭാരത്തിന് സമാനമായ ഡമ്മി ഉപയോഗിച്ച് ലോഹഗഡ് കോട്ടയിൽ കുറ്റകൃത്യം പുനരാവിഷ്കരിച്ച് പൊലീസ്

പുണെ: വ്യവസായി കേതൻ അഗർവാളിന്റെ കൊലപാതകവുമായി ബന്ധപ്പെട്ട അന്വേഷണത്തിൽ നിർണായക നീക്കവുമായി പുണെ റൂറൽ പൊലീസ്. മഹാരാഷ്ട്രയിലെ ലോഹഗഡ് കോട്ടയിൽ സംഭവസ്ഥലം പുനരാവിഷ്കരിക്കുന്നതിനായി കേതന്റെ ശരീരഭാരത്തിന് സമാനമായ ഡമ്മി ഉപയോഗിച്ച് പൊലീസ് തെളിവെടുപ്പ് നടത്തി. പ്രതികളായ സിയ ഗോയലിനെയും ചേതൻ ചൗധരിയെയും സ്ഥലത്തെത്തിച്ചാണ് അന്വേഷണസംഘം സംഭവക്രമം പുനർനിർമ്മിച്ചത്. 

അന്വേഷണത്തിന്റെ ഭാഗമായി ഡമ്മിയെ കൊക്കയിലേക്ക് തള്ളിവിട്ട് വീഴ്ചയുടെ ദിശ, ആഘാതം, പ്രതികൾ നൽകിയ മൊഴികളുടെ വിശ്വാസ്യത എന്നിവ പരിശോധിച്ചു. സംഭവസമയത്ത് എന്താണ് നടന്നതെന്ന് ശാസ്ത്രീയമായി വിലയിരുത്തുന്നതിനും ഫോറൻസിക് തെളിവുകൾ ശക്തിപ്പെടുത്തുന്നതിനുമാണ് ഈ നടപടിയെന്ന് പൊലീസ് വ്യക്തമാക്കി. 

ജൂൺ 18-ന് ലോഹഗഡ് കോട്ടയിൽ ട്രെക്കിംഗിനിടെ അപകടത്തിൽപ്പെട്ട് മരിച്ചതാണെന്ന് ആദ്യം കരുതിയിരുന്ന കേതൻ അഗർവാളിന്റെ മരണം പിന്നീട് ആസൂത്രിത കൊലപാതകമാണെന്ന് അന്വേഷണത്തിൽ കണ്ടെത്തുകയായിരുന്നു. വിവാഹനിശ്ചയം കഴിഞ്ഞിരുന്ന സിയ ഗോയലും അവളുടെ സുഹൃത്തായ ചേതൻ ചൗധരിയും ചേർന്നാണ് കൊലപാതകം ആസൂത്രണം ചെയ്ത് നടപ്പാക്കിയതെന്നാണ് പൊലീസ് ആരോപിക്കുന്നത്. 

അതേസമയം, സംഭവസ്ഥലത്തെ സിസിടിവി ദൃശ്യങ്ങളുമായി താരതമ്യം ചെയ്യുന്നതിനായി പ്രതിയുടെ നടപ്പുരീതി (gait analysis) ഉൾപ്പെടെയുള്ള ഫോറൻസിക് പരിശോധനകളും പൊലീസ് പുരോഗമിപ്പിക്കുകയാണ്. കേസിൽ കൂടുതൽ ശാസ്ത്രീയ തെളിവുകൾ ശേഖരിക്കാനുള്ള ശ്രമങ്ങൾ തുടരുകയാണെന്ന് അന്വേഷണ ഉദ്യോഗസ്ഥർ അറിയിച്ചു.