മണിപ്പൂരിൽ രാഷ്ട്രീയ സംഘർഷം: സംസ്ഥാനത്ത് രാഷ്ട്രപതി ഭരണത്തിന് സാധ്യത

ഇംഫാൽ: മുഖ്യമന്ത്രി ബിരേൻ സിംഗ് ഇന്ന് രാജി പ്രഖ്യാപിച്ചതിനെ തുടർന്ന് തിങ്കളാഴ്ച ആരംഭിക്കാനിരുന്ന നിയമസഭാ സമ്മേളനം മണിപ്പൂരിൽ റദ്ദാക്കി. സംസ്ഥാനത്ത് രാഷ്ട്രപതി ഭരണം ഏർപ്പെടുത്താൻ സാധ്യതയുണ്ടെന്ന് റിപ്പോർട്ടുകൾ. ഞായറാഴ്ച ഡൽഹിയിലെത്തി കേന്ദ്രമന്ത്രി അമിത് ഷായെയും പാർട്ടി അധ്യക്ഷൻ ജെ പി നദ്ദയെയും കണ്ട ശേഷമാണ് ബിരേൻ സിംഗ് രാജിവച്ചത്. വൈകുന്നേരം ഗവർണർ അജയ് ഭല്ലയ്ക്കും ചില മന്ത്രിമാർക്കും രാജിക്കത്ത് സമർപ്പിച്ചു.

ബജറ്റ് സമ്മേളനം നടക്കാനിരിക്കെയാണ് സിങ് രാജി പ്രഖ്യാപിച്ചത്. തിങ്കളാഴ്ച മുഖ്യമന്ത്രിക്കെതിരെ അവിശ്വാസ പ്രമേയം അവതരിപ്പിക്കാൻ കോൺഗ്രസ് ആലോചിക്കുകയായിരുന്നു.

അതേസമയം, മണിപ്പൂർ ഗവർണർ നേരിട്ട് ഡൽഹിയിലെത്തി സംസ്ഥാനത്തെ രാഷ്ട്രീയ സ്ഥിതിഗതികൾ രാഷ്ട്രപതിയെ അറിയിക്കും. ഭരണകക്ഷിയിലെ 12 എംഎൽഎമാർ ബിരേൻ സിംഗ് രാജിവയ്ക്കണമെന്ന് ശക്തമായി ആവശ്യപ്പെട്ടു. ബിരേൻ സിംഗ് സ്ഥാനത്ത് തുടർന്നാൽ രാജിവയ്ക്കുമെന്ന് ഈ എംഎൽഎമാർ ഭീഷണി മുഴക്കിയതായി റിപ്പോർട്ടുകളുണ്ട്.

മ്‌നൈപൂരിലെ കലാപത്തെത്തുടർന്ന്, പ്രക്ഷോഭം നടത്തുന്ന വംശീയ ഗോത്രങ്ങളെ വിശ്വാസത്തിലെടുക്കാൻ മുഖ്യമന്ത്രിയെ മാറ്റണമെന്ന് ഭരണകക്ഷി എംഎൽഎമാരിൽ നിന്ന് ആവശ്യമുയർന്നു. നിരവധി ചർച്ചകൾ പൂർത്തിയാക്കിയെങ്കിലും ബിരേൻ സിംഗിനെ സ്ഥാനത്ത് തുടരാൻ കേന്ദ്ര നേതൃത്വം പിന്തുണച്ചു. മണിപ്പൂരിലെ കുക്കി സമുദായത്തിൽ നിന്നുള്ള എംഎൽഎമാർ മുഖ്യമന്ത്രിയെ മാറ്റണമെന്ന് ആവശ്യപ്പെടുന്നതിന് മുമ്പ് നിരവധി തവണ കേന്ദ്ര നേതൃത്വത്തെ കണ്ടിരുന്നു.