ഖാർഗെയുടെ ഹൽദ്വാനി റാലിക്ക് ശേഷം ‘ശുദ്ധീകരണ’ ചടങ്ങ്; എഫ്ഐആർ ആവശ്യപ്പെട്ട് രാഹുൽ ഗാന്ധി

കോൺഗ്രസ് അധ്യക്ഷൻ മല്ലികാർജുൻ ഖാർഗെ ഹൽദ്വാനിയിൽ റാലി നടത്തിയ വേദിയിൽ ‘ശുദ്ധീകരണ’ ചടങ്ങ് നടത്തിയ സംഭവത്തിൽ എഫ്ഐആർ രജിസ്റ്റർ ചെയ്യണമെന്ന് ലോക്സഭാ പ്രതിപക്ഷ നേതാവ് രാഹുൽ ഗാന്ധി ആവശ്യപ്പെട്ടു. പട്ടികജാതി-പട്ടികവർഗ വിഭാഗങ്ങൾക്കെതിരായ അതിക്രമങ്ങൾ തടയുന്നതിനുള്ള നിയമപ്രകാരം കേസെടുക്കണമെന്നാണ് ആവശ്യം. 

ഖാർഗെയുടെ റാലിക്ക് പിന്നാലെ വേദിയിൽ ‘ശുദ്ധീകരണ യജ്ഞം’ നടത്തിയെന്ന റിപ്പോർട്ടുകളാണ് വിവാദമായത്. സംഭവത്തെ രാഹുൽ ഗാന്ധി ജാതിവിവേചനത്തിന്റെ ഭാഗമായും തൊട്ടുകൂടായ്മയുടെ മറ്റൊരു രൂപമായും വിശേഷിപ്പിച്ചു. 

സംഭവത്തിൽ പ്രധാനമന്ത്രി നരേന്ദ്ര മോദിയും ഉത്തരാഖണ്ഡ് സർക്കാരും അടിയന്തരമായി ഇടപെടണമെന്ന് രാഹുൽ ഗാന്ധി ആവശ്യപ്പെട്ടു. ബിജെപി-ആർഎസ്എസ് നേതൃത്വത്തെയും അദ്ദേഹം വിമർശിച്ചു. ദലിത് സമൂഹത്തിന്റെ പുരോഗതിയെയും തുല്യ അവകാശങ്ങളെയും തടയുന്ന മനോഭാവമാണ് സംഭവത്തിന് പിന്നിലെന്നാണ് അദ്ദേഹത്തിന്റെ ആരോപണം. 

അതേസമയം, സംഭവവുമായി ബിജെപിക്ക് ബന്ധമില്ലെന്നും ‘ശുദ്ധീകരണ’ ചടങ്ങ് മതപരമായ ആചാരമാണെന്നുമാണ് ബിജെപി നേതാക്കളുടെ നിലപാട്. ഇതോടെ വിഷയത്തിൽ കോൺഗ്രസും ബിജെപിയും തമ്മിലുള്ള രാഷ്ട്രീയ വാക്പോര് ശക്തമായിരിക്കുകയാണ്.