രാമക്ഷേത്ര ട്രസ്റ്റ് സെക്രട്ടറി ചമ്പത് റായ് രാജിവെച്ചു? സംഭാവന വിവാദത്തിനിടെ രാജി വാഗ്ദാനം ചെയ്തതായി റിപ്പോർട്ട്

അയോധ്യ: രാമക്ഷേത്രത്തിലെ സംഭാവനാ ക്രമക്കേട് വിവാദം ശക്തമാകുന്നതിനിടെ, ശ്രീരാം ജന്മഭൂമി തീർത്ഥ ക്ഷേത്ര ട്രസ്റ്റിന്റെ ജനറൽ സെക്രട്ടറി ചമ്പത് റായ് രാജിവെച്ചതായി റിപ്പോർട്ടുകൾ. ട്രസ്റ്റി അനിൽ മിശ്രയും രാജി വാഗ്ദാനം ചെയ്തതായി ദേശീയ മാധ്യമങ്ങൾ റിപ്പോർട്ട് ചെയ്യുന്നു. എന്നാൽ ട്രസ്റ്റ് ഇതുവരെ രാജി ഔദ്യോഗികമായി അംഗീകരിച്ചിട്ടില്ലെന്നും അന്തിമ തീരുമാനം ഉണ്ടായിട്ടില്ലെന്നും സൂചനയുണ്ട്. 

സംഭാവനാ തുകയുടെ ദുരുപയോഗവുമായി ബന്ധപ്പെട്ട അന്വേഷണത്തിന്റെ ഭാഗമായി പ്രത്യേക അന്വേഷണസംഘം (SIT) സമർപ്പിച്ച പ്രാഥമിക റിപ്പോർട്ടിന് പിന്നാലെയാണ് ഈ നീക്കം. കേസിൽ എട്ടുപേരെ അറസ്റ്റ് ചെയ്തിട്ടുണ്ട്. ഇവരിൽ ചമ്പത് റായിയുടെ ഡ്രൈവറും ഉൾപ്പെട്ടിട്ടുണ്ടെന്നാണ് റിപ്പോർട്ടുകൾ. 

സംഭാവനകളുടെ കണക്കെടുപ്പിലും സുരക്ഷാ സംവിധാനങ്ങളിലുമുണ്ടായതായി ആരോപിക്കപ്പെടുന്ന ക്രമക്കേടുകളാണ് അന്വേഷണവിധേയമാകുന്നത്. ട്രസ്റ്റിന്റെ പ്രവർത്തനത്തിൽ കൂടുതൽ സുതാര്യത ഉറപ്പാക്കുന്നതിനായി ഘടനാപരമായ മാറ്റങ്ങൾ വേണമെന്ന ശുപാർശയും എസ്‌ഐടി റിപ്പോർട്ടിൽ ഉൾപ്പെട്ടിട്ടുണ്ടെന്നാണ് റിപ്പോർട്ടുകൾ. 

അതേസമയം, ചമ്പത് റായ് നേരത്തെ തന്നെ സാമ്പത്തിക ക്രമക്കേട് ആരോപണങ്ങൾ നിഷേധിച്ചിരുന്നു. ട്രസ്റ്റിന്റെ ആഭ്യന്തര ഓഡിറ്റിൽ ഇതുവരെ ക്രമക്കേടുകൾ കണ്ടെത്തിയിട്ടില്ലെന്നും സംഭാവനകൾ കൃത്യമായ നടപടിക്രമങ്ങൾ പാലിച്ചാണ് കൈകാര്യം ചെയ്യുന്നതെന്നുമായിരുന്നു അദ്ദേഹത്തിന്റെ നിലപാട്. 

രാജി സംബന്ധിച്ച അന്തിമ തീരുമാനം ട്രസ്റ്റ് അധികൃതർ ഔദ്യോഗികമായി പ്രഖ്യാപിച്ച ശേഷമേ വ്യക്തതയുണ്ടാകൂ. നിലവിൽ അന്വേഷണം തുടരുകയാണ്.