യോഗ കേന്ദ്രത്തിൽ രാമക്ഷേത്ര നേർച്ചപ്പണ തട്ടിപ്പ്: 2025 കുംഭമേളയ്ക്കിടെ നടന്നത് ഏറ്റവും വലിയ മോഷണം, വൻതുക പിടിച്ചെടുത്തു

അയോധ്യ: അയോധ്യയിലെ രാമക്ഷേത്രത്തിലെ നേർച്ചപ്പണ തട്ടിപ്പ് കേസിൽ നിർണായക വിവരങ്ങൾ പുറത്തുവന്നു. 2025-ലെ കുംഭമേളയ്ക്കിടെയാണ് ഏറ്റവും വലിയ തോതിൽ നേർച്ചപ്പണം തട്ടിയെടുത്തതെന്ന് പ്രത്യേക അന്വേഷണ സംഘം (SIT) കണ്ടെത്തി. കേസുമായി ബന്ധപ്പെട്ട് നടത്തിയ റെയ്ഡിൽ ഒരു യോഗ കേന്ദ്രത്തിൽ ഒളിപ്പിച്ചിരുന്ന വൻതുക പണവും പൊലീസ് പിടിച്ചെടുത്തു. 

ഇതിനോടകം എട്ട് പ്രതികളെ കേസിൽ അറസ്റ്റ് ചെയ്തിട്ടുണ്ട്. ഇവരിൽ ബന്ധുക്കളായ ലവ്കുഷ് മിശ്രയും അനുകൽപ് മിശ്രയും ഏറ്റവും കൂടുതൽ തുക തട്ടിയെടുത്തതായി അന്വേഷണത്തിൽ കണ്ടെത്തി. മോഷ്ടിച്ച പണം ഉപയോഗിച്ച് നിരവധി സ്വത്തുക്കൾ വാങ്ങിയതായും അന്വേഷണ സംഘം ആരോപിക്കുന്നു. 

പ്രധാന പ്രതിയായ അവിനാഷ് ശുക്ലയുമായി ബന്ധമുള്ള ഒരു യോഗ കേന്ദ്രത്തിൽ നടത്തിയ പരിശോധനയിലാണ് വൻതുക കണ്ടെത്തിയത്. പുതപ്പുകൾക്കുള്ളിൽ ഒളിപ്പിച്ച നിലയിൽ നാല് പെട്ടികളിലായാണ് പണം സൂക്ഷിച്ചിരുന്നത്. ഇതിൽ ഒരു പെട്ടിയിൽ "റാം രാജ്യ കോഷ്" എന്ന് രേഖപ്പെടുത്തിയിരുന്നതായും പൊലീസ് അറിയിച്ചു. 

അന്വേഷണത്തിന്റെ ഭാഗമായി ക്ഷേത്രത്തിലെ നേർച്ചപ്പണത്തിന്റെ കണക്കെടുപ്പിലും ബാങ്ക് നിക്ഷേപ നടപടികളിലും ഗുരുതര ക്രമക്കേടുകൾ കണ്ടെത്തിയിട്ടുണ്ട്. ചില ബാങ്ക് ജീവനക്കാരുടെ പങ്കും അന്വേഷണ പരിധിയിലായതായി അധികൃതർ അറിയിച്ചു. ആദായനികുതി വകുപ്പിന്റെയും മറ്റ് ഏജൻസികളുടെയും സഹായത്തോടെ പ്രതികളുടെ സാമ്പത്തിക ഇടപാടുകളും സ്വത്തുക്കളും പരിശോധിച്ചുവരികയാണ്. 

ക്ഷേത്രത്തിനുള്ളിലെ സിസിടിവി നിരീക്ഷണത്തിലെ വീഴ്ചകൾ മുതലെടുത്ത് പണം ശൗചാലയങ്ങളിൽ ഒളിപ്പിച്ച ശേഷം പുറത്തേക്ക് കടത്തിയെന്ന വിവരവും അന്വേഷണത്തിൽ പുറത്തുവന്നിട്ടുണ്ട്. കേസിൽ കൂടുതൽ ആളുകൾക്ക് പങ്കുണ്ടോയെന്ന ദിശയിലും അന്വേഷണം വ്യാപിപ്പിച്ചിരിക്കുകയാണ്.