ഹിന്ദു വിവാഹത്തിന് രജിസ്ട്രേഷൻ മാത്രം പോര; ആചാരപ്രകാരമുള്ള ചടങ്ങുകളും നിർബന്ധമെന്ന് ഗുജറാത്ത് ഹൈക്കോടതി

ഹിന്ദു വിവാഹം നിയമപരമായി സാധുവാകാൻ വിവാഹ രജിസ്ട്രേഷൻ മാത്രം മതിയാകില്ലെന്നും, ആചാരപ്രകാരമുള്ള നിർബന്ധ ചടങ്ങുകൾ നടന്നിരിക്കണമെന്നും ഗുജറാത്ത് ഹൈക്കോടതി വ്യക്തമാക്കി. പ്രത്യേകിച്ച്, ബന്ധപ്പെട്ട ആചാരങ്ങളിൽ ഉൾപ്പെട്ടിട്ടുണ്ടെങ്കിൽ സപ്തപദി (അഗ്നിയെ സാക്ഷിയാക്കി ഏഴ് ചുവടുകൾ വയ്ക്കുന്ന ചടങ്ങ്) പോലുള്ള അനുഷ്ഠാനങ്ങൾ പൂർത്തിയാകണമെന്നാണ് കോടതിയുടെ നിരീക്ഷണം. 

യുകെയിൽ താമസിക്കുന്ന ഒരാളും ഒരു സ്ത്രീയും തമ്മിലുള്ള വിവാഹവുമായി ബന്ധപ്പെട്ട കേസിലാണ് ഹൈക്കോടതിയുടെ നിർണായക വിധി. വിവാഹ രജിസ്ട്രേഷൻ സർട്ടിഫിക്കറ്റ് ഉണ്ടെന്നത് മാത്രം വിവാഹം നിയമപരമായി നിലവിലുണ്ടെന്നതിന് മതിയായ തെളിവല്ലെന്നും, അത് മുമ്പ് നിയമാനുസൃതമായി നടന്ന വിവാഹത്തിന്റെ തെളിവ് മാത്രമാണെന്നും കോടതി ചൂണ്ടിക്കാട്ടി. 

ഹിന്ദു വിവാഹ നിയമത്തിലെ (Hindu Marriage Act, 1955) സെക്ഷൻ 7 പ്രകാരം, വിവാഹം ഇരുകൂട്ടരുടെയും ആചാരങ്ങൾക്കും ചടങ്ങുകൾക്കും അനുസരിച്ച് നടത്തണം. ആചാരങ്ങളിൽ സപ്തപദി ഉൾപ്പെട്ടിട്ടുണ്ടെങ്കിൽ ഏഴാമത്തെ ചുവട് പൂർത്തിയാകുമ്പോഴാണ് വിവാഹം നിയമപരമായി പൂർണമാകുന്നതെന്നും കോടതി വ്യക്തമാക്കി. 

"വിവാഹം പാട്ടിനും നൃത്തത്തിനുമുള്ള ഒരു ചടങ്ങ് മാത്രമല്ല; അത് മതപരവും സാമൂഹികവും നിയമപരവുമായ പ്രാധാന്യമുള്ള ഒരു സംസ്കാരമാണ്" എന്നും കോടതി നിരീക്ഷിച്ചു. കുടുംബക്കോടതിയുടെ മുൻ ഉത്തരവ് ചോദ്യം ചെയ്ത അപ്പീലിലാണ് ഗുജറാത്ത് ഹൈക്കോടതി ഈ സുപ്രധാന വിധി പുറപ്പെടുവിച്ചത്.