സിദ്ധിവിനായക് ക്ഷേത്രത്തിൽ വർഷംതോറും ₹18 കോടി മോഷണം; ഗുരുതര ആരോപണവുമായി രാജ് താക്കറെ

മുംബൈയിലെ പ്രശസ്തമായ സിദ്ധിവിനായക് ക്ഷേത്രത്തിലെ ഭക്തരുടെ വഴിപാടുകളിൽ നിന്ന് പ്രതിവർഷം ഏകദേശം ₹18 കോടി തട്ടിയെടുക്കപ്പെടുന്നുവെന്ന് മഹാരാഷ്ട്ര നവനിർമാണ് സേന (എംഎൻഎസ്) അധ്യക്ഷൻ രാജ് താക്കറെ ആരോപിച്ചു. എംഎൻഎസ് വിദ്യാർത്ഥി വിഭാഗം സംഘടിപ്പിച്ച പരിപാടിയിലാണ് അദ്ദേഹം ഇക്കാര്യം പറഞ്ഞത്. 

ക്ഷേത്ര ട്രസ്റ്റിലെ എട്ട് ട്രസ്റ്റിമാർ മഹാരാഷ്ട്ര ഉപമുഖ്യമന്ത്രി ഏക്നാഥ് ഷിൻഡെയ്ക്ക് നൽകിയ കത്ത് ഉദ്ധരിച്ചാണ് രാജ് താക്കറെ ആരോപണം ഉന്നയിച്ചത്. ട്രസ്റ്റിമാരുടെ ജാഗ്രതയെ തുടർന്നാണ് വഴിപാടുപെട്ടിയിൽ നിന്ന് പണം മോഷ്ടിച്ച ജീവനക്കാർ പിടിയിലായതെന്നും അദ്ദേഹം പറഞ്ഞു. മോഷണം പുറത്തുവന്നതിന് മുമ്പ് ആഴ്ചതോറും ₹50 ലക്ഷത്തിൽ താഴെയായിരുന്ന വഴിപാടുവരുമാനം പിന്നീട് ₹1.5 കോടിയായി ഉയർന്നതായും അദ്ദേഹം അവകാശപ്പെട്ടു. 

അതേസമയം, കേസുമായി ബന്ധപ്പെട്ട് ഒമ്പത് ജീവനക്കാരെ അറസ്റ്റ് ചെയ്തതായി സിദ്ധിവിനായക് ക്ഷേത്ര ട്രസ്റ്റ് ചെയർമാനും ശിവസേന നേതാവുമായ സദാ സർവങ്കർ അറിയിച്ചു. ആവശ്യമായിടത്തെല്ലാം കേസെടുത്തിട്ടുണ്ടെന്നും, ട്രസ്റ്റ് സ്വീകരിച്ച നടപടികളുടെ ഫലമായാണ് ക്ഷേത്രത്തിന്റെ വരുമാനം രണ്ട് വർഷം മുമ്പത്തെ ₹114 കോടിയിൽ നിന്ന് ₹182 കോടിയായി ഉയർന്നതെന്നും അദ്ദേഹം വിശദീകരിച്ചു.