കാനഡയിൽ അമി വിർക്കിന്റെ വാഹനവ്യൂഹത്തിന് നേരെ വെടിവയ്പ്; ഏഴ് റൗണ്ട്, പരുക്കേൽക്കാതെ ഗായകൻ

കാനഡയിലെ അബോട്ട്സ്ഫോർഡിൽ പഞ്ചാബി ഗായകനും നടനുമായ അമി വിർക്കിന്റെ കച്ചേരി സംഘവുമായി ബന്ധപ്പെട്ട വാഹനത്തിന് നേരെ വെടിവയ്പ്. സെപ്റ്റംബർ അഞ്ചിന് രാത്രി കച്ചേരി കഴിഞ്ഞ് മടങ്ങുന്നതിനിടെയായിരുന്നു സംഭവം. വാഹനവ്യൂഹത്തിലെ ഒരു കാറിലേക്ക് ഏകദേശം ഏഴ് റൗണ്ട് വെടിയുതിർത്തതായാണ് റിപ്പോർട്ട്. സംഭവത്തിൽ ആർക്കും പരുക്കേറ്റിട്ടില്ല.

റോജേഴ്സ് ഫോറത്തിൽ പരിപാടി കഴിഞ്ഞതിന് പിന്നാലെ രാത്രി 11 മണിയോടെയാണ് സംഭവം. ഇരുണ്ട നിറത്തിലുള്ള ഒരു എസ്.യു.വിയിൽ നിന്നാണ് വെടിയുതിർത്തതെന്നാണ് അബോട്ട്സ്ഫോർഡ് പൊലീസ് പറയുന്നത്. മക്കല്ലം റോഡിലൂടെ സഞ്ചരിച്ചിരുന്ന വാഹനത്തെയാണ് ആക്രമണം ലക്ഷ്യമിട്ടതെന്നാണ് പ്രാഥമിക വിവരം. സംഭവത്തിന് പിന്നാലെ അഞ്ച് കിലോമീറ്റർ അകലെയുള്ള സണ്ണിസൈഡ് പ്ലേസിൽ കത്തിയ നിലയിൽ മറ്റൊരു എസ്.യു.വി കണ്ടെത്തുകയും ചെയ്തു. രണ്ട് സംഭവങ്ങളും തമ്മിൽ ബന്ധമുണ്ടോയെന്ന് പൊലീസ് പരിശോധിക്കുകയാണ്.

അമി വിർക്കിന്റെ വാഹനവ്യൂഹത്തിലെ ബുള്ളറ്റ് പ്രൂഫ് റോള്സ് റോയ്സ് കാറാണ് ആക്രമണത്തിന് ഇരയായതെന്നാണ് വിവിധ റിപ്പോർട്ടുകൾ. വിർക്ക് വാഹനത്തിലുണ്ടായിരുന്നുവെന്നും ചില റിപ്പോർട്ടുകൾ അവകാശപ്പെടുന്നുണ്ടെങ്കിലും, വാഹനത്തിലെ യാത്രക്കാരെക്കുറിച്ച് പൊലീസ് ഔദ്യോഗികമായി സ്ഥിരീകരിച്ചിട്ടില്ല. ആക്രമണം ലക്ഷ്യമിട്ടുള്ളതാണെന്നാണ് അന്വേഷണ സംഘത്തിന്റെ പ്രാഥമിക വിലയിരുത്തൽ.

അബോട്ട്സ്ഫോർഡ് പൊലീസിന്റെ മേജർ ക്രൈം യൂണിറ്റാണ് അന്വേഷണം നടത്തുന്നത്. സംഭവസമയത്ത് പ്രദേശത്തുണ്ടായിരുന്നവർ, വാഹനത്തിന്റെ ഡാഷ്‌ക്യാം ദൃശ്യങ്ങൾ കൈവശമുള്ളവർ എന്നിവരോട് വിവരങ്ങൾ നൽകാൻ പൊലീസ് അഭ്യർഥിച്ചിട്ടുണ്ട്. ആക്രമണത്തിന് പിന്നിലെ കാരണം എന്താണെന്ന കാര്യത്തിലും അന്വേഷണം തുടരുകയാണ്. ഇതുവരെ അറസ്റ്റുകളൊന്നും റിപ്പോർട്ട് ചെയ്തിട്ടില്ല.

അമി വിർക്കിന്റെ 2026 യൂണിറ്റി ടൂറിനിടെയാണ് സംഭവം. നേരത്തെയും കാനഡയിലെ അദ്ദേഹത്തിന്റെ പരിപാടിയുമായി ബന്ധപ്പെട്ട് ചില സംഘർഷങ്ങൾ റിപ്പോർട്ട് ചെയ്തിരുന്നു. എന്നാൽ ഇപ്പോഴത്തെ വെടിവയ്പ്പിന് പിന്നിലെ ലക്ഷ്യമോ പ്രതികളാരെന്നോ വ്യക്തമാകാത്ത സാഹചര്യത്തിൽ, അന്വേഷണത്തിന്റെ തുടർനീക്കങ്ങളിലേക്കാണ് ശ്രദ്ധ.