കനത്ത മഞ്ഞുവീഴ്ചയിൽ നേപ്പാളിലെ ആഴമേറിയ തടാകത്തിന് സമീപം ആറ് ഇന്ത്യൻ വിനോദസഞ്ചാരികൾ കുടുങ്ങി; രക്ഷാപ്രവർത്തനം തുടരുന്നു
നേപ്പാളിലെ ഏറ്റവും ആഴമേറിയ തടാകമായ ഷേയ് ഫോക്‌സുണ്ടോയ്ക്ക് സമീപം കനത്ത മഞ്ഞുവീഴ്ചയെ തുടർന്ന് ആറ് ഇന്ത്യൻ വിനോദസഞ്ചാരികൾ കുടുങ്ങി. രണ്ട് സ്ത്രീകളും നാല് പുരുഷന്മാരും ഉൾപ്പെടുന്ന സംഘത്തെ രക്ഷപ്പെടുത്താൻ നേപ്പാൾ സൈന്യത്തിന്റെ നേതൃത്വത്തിൽ ഹെലികോപ്റ്റർ ഉപയോഗിച്ചുള്ള രക്ഷാപ്രവർത്തനത്തിന് നീക്കം ആരംഭിച്ചു. ശനിയാഴ്ച ഉച്ചയോടെയാണ് വിനോദസഞ്ചാരികൾ ഡോൽപ ജില്ലയിലെ ഷേയ് ഫോക്‌സുണ്ടോ ദേശീയോദ്യാന മേഖലയിലെ ദോ പ്രദേശത്ത് കുടുങ്ങിയത്. നവംബർ ഒന്നിന് അധികൃതരാണ് വിവരം പുറത്തുവിട്ടത്.
മൗമിത ഹാൽദർ, പിയാലി കോലെ, ജജ്ല ത്രിവേദി കുമാർ, ആദിത്യ സിംഗ, ദിപ്ലിന ബിശ്വാസ്, രാജേഷ് ദേ എന്നിവരാണ് സംഘത്തിലുള്ളതെന്ന് ഡോൽപ ജില്ലാ ഭരണകൂടം അറിയിച്ചു. പ്രദേശത്ത് ശക്തമായ മഞ്ഞുവീഴ്ച തുടരുന്നതിനാൽ യാത്ര ദുഷ്കരമായിരുന്നു. സുരക്ഷാ ഉദ്യോഗസ്ഥരും നേപ്പാളി ഗൈഡും മുന്നറിയിപ്പ് നൽകിയിട്ടും സംഘം തടാകത്തിന് സമീപത്തേക്ക് യാത്ര തുടർന്നതായാണ് അധികൃതർ വ്യക്തമാക്കിയത്. ഗൈഡിനെ പിന്നിലാക്കി സംഘം മുന്നോട്ടുപോയതിനെത്തുടർന്ന് ശനിയാഴ്ച രാത്രിയോടെ ആശയവിനിമയം നഷ്ടപ്പെട്ടു.
വിനോദസഞ്ചാരികൾ കുടുങ്ങിയ പ്രദേശം കണ്ടെത്തിയിട്ടുണ്ടെന്നും രക്ഷാപ്രവർത്തനത്തിനായി സൈനിക ഹെലികോപ്റ്റർ എത്തുമെന്നും ഡോൽപ ചീഫ് ജില്ലാ ഓഫീസർ ജുനു ധാക്കൽ അറിയിച്ചു. കനത്ത മഞ്ഞുവീഴ്ചയും പ്രതികൂല കാലാവസ്ഥയും രക്ഷാപ്രവർത്തനത്തിന് വെല്ലുവിളിയാകുന്നുണ്ട്. പ്രദേശത്തെ സുരക്ഷാ ഉദ്യോഗസ്ഥരെയും രക്ഷാപ്രവർത്തനത്തിനായി നിയോഗിച്ചിട്ടുണ്ട്. വിനോദസഞ്ചാരികളുടെ കൃത്യമായ സ്ഥിതിയും ആരോഗ്യനിലയും സംബന്ധിച്ച കൂടുതൽ വിവരങ്ങൾ ലഭ്യമായിട്ടില്ല.
സമുദ്രനിരപ്പിൽനിന്ന് ഏകദേശം 3,600 മീറ്റർ ഉയരത്തിൽ സ്ഥിതിചെയ്യുന്ന ഷേയ് ഫോക്‌സുണ്ടോ തടാകത്തിന് ഏകദേശം 145 മീറ്റർ ആഴമുണ്ട്. നേപ്പാളിലെ ഏറ്റവും ആഴമേറിയ തടാകമെന്ന പ്രത്യേകതയുള്ള ഈ പ്രദേശം വിനോദസഞ്ചാരികളുടെയും ട്രെക്കിങ് പ്രേമികളുടെയും പ്രധാന ആകർഷണകേന്ദ്രമാണ്. എന്നാൽ ഉയർന്ന പ്രദേശങ്ങളിലെ കാലാവസ്ഥാ വ്യതിയാനവും കനത്ത മഞ്ഞുവീഴ്ചയും യാത്രക്കാർക്ക് വലിയ വെല്ലുവിളിയാണ് സൃഷ്ടിക്കുന്നത്.
മോശം കാലാവസ്ഥയെ തുടർന്ന് പ്രദേശത്ത് കുടുങ്ങിയവരെ സുരക്ഷിതമായി പുറത്തെത്തിക്കാനുള്ള ശ്രമങ്ങൾ തുടരുകയാണ്. പ്രതികൂല കാലാവസ്ഥയുള്ള മേഖലകളിലേക്ക് യാത്ര ചെയ്യരുതെന്നും സുരക്ഷാ നിർദേശങ്ങൾ കർശനമായി പാലിക്കണമെന്നും നേപ്പാൾ അധികൃതർ വിനോദസഞ്ചാരികൾക്ക് മുന്നറിയിപ്പ് നൽകിയിട്ടുണ്ട്. ആറ് ഇന്ത്യക്കാരെയും സുരക്ഷിതമായി തിരിച്ചെത്തിക്കാനുള്ള രക്ഷാപ്രവർത്തനത്തിലാണ് അധികൃതർ.
