സർക്കാർ ആശുപത്രിയിൽ തന്നെ തുടരും സോനം വാങ്ചുക്

കാലാവസ്ഥാ പ്രവർത്തകനായ സോനം വാങ്ചുക്കിനെ സർക്കാർ ആശുപത്രിയിൽ നിന്ന് സ്വകാര്യ ആശുപത്രിയിലേക്ക് മാറ്റണമെന്ന ഹർജി ഡൽഹി ഹൈക്കോടതി തള്ളി. നിലവിൽ അദ്ദേഹം സഫ്ദർജംഗ് ആശുപത്രിയിൽ ചികിത്സ തുടരുമെന്നും കേസ് ജൂലൈ 24-ന് വീണ്ടും പരിഗണിക്കുമെന്നും കോടതി അറിയിച്ചു. 

വാങ്ചുക്കിന്റെ ഭാര്യ ഗീതാഞ്ജലി ആംഗ്മോയാണ് ചികിത്സയുമായി ബന്ധപ്പെട്ട ആശങ്കകൾ ചൂണ്ടിക്കാട്ടി ആശുപത്രി മാറ്റണമെന്ന് ആവശ്യപ്പെട്ട് കോടതിയെ സമീപിച്ചത്. എന്നാൽ നിലവിൽ ഇടക്കാല ഉത്തരവ് നൽകേണ്ട സാഹചര്യമില്ലെന്ന് കോടതി വ്യക്തമാക്കി. 

വാങ്ചുക്കിന്റെ ആരോഗ്യനില വിദഗ്ധ ഡോക്ടർമാർ നിരന്തരം നിരീക്ഷിച്ചുവരികയാണെന്നും ആവശ്യമായ ചികിത്സ നൽകുന്നുണ്ടെന്നും കേന്ദ്ര സർക്കാർ കോടതിയെ അറിയിച്ചു. കേസിൽ കേന്ദ്ര സർക്കാരിനോട് വിശദമായ മറുപടി സമർപ്പിക്കാനും കോടതി നിർദേശിച്ചു.