തമിഴ്നാട് ഉപതിരഞ്ഞെടുപ്പ്: രണ്ട് നിർണായക സീറ്റുകളിലേക്ക് വിജയ് സ്ഥാനാർഥികളെ പ്രഖ്യാപിച്ചു

തമിഴ്നാട്ടിലെ മധുരാന്തകം, താരാപുരം നിയമസഭാ മണ്ഡലങ്ങളിലേക്ക് ഒക്ടോബർ 6ന് നടക്കുന്ന ഉപതിരഞ്ഞെടുപ്പിൽ തമിഴക വെട്രി കഴകം സ്ഥാനാർഥികളെ പ്രഖ്യാപിച്ചു. പാർട്ടി അധ്യക്ഷനും മുഖ്യമന്ത്രി കൂടിയായ വിജയാണ് ഇന്ന് സ്ഥാനാർഥികളെ ഔദ്യോഗികമായി പ്രഖ്യാപിച്ചത്. 

മധുരാന്തകം സംവരണ മണ്ഡലത്തിൽ കെ. മരകതം കുമാരവേലിനെയാണ് സ്ഥാനാർഥിയാക്കിയത്. താരാപുരം സംവരണ മണ്ഡലത്തിൽ പി. സത്യബാമ മത്സരിക്കും. ഇരുവരും നേരത്തെ അണ്ണാ ഡിഎംകെ സ്ഥാനാർഥികളായി വിജയിച്ചവരാണ്. പിന്നീട് എംഎൽഎ സ്ഥാനം രാജിവെച്ച് തമിഴക വെട്രി കഴകത്തിൽ ചേർന്നതിനെ തുടർന്നാണ് ഈ രണ്ട് മണ്ഡലങ്ങളും ഒഴിവായത്. 

മരകതം കുമാരവേൽ നിലവിൽ തമിഴക വെട്രി കഴകത്തിന്റെ ഉപപൊതുസെക്രട്ടറിയാണ്. സത്യബാമ തിരുപ്പൂർ തെക്കുകിഴക്കൻ ജില്ലാ സെക്രട്ടറിയായും പ്രവർത്തിക്കുന്നു. രാജിവെച്ച് പാർട്ടിയിൽ ചേർന്ന ഇരുവർക്കും ഉപതിരഞ്ഞെടുപ്പിൽ വീണ്ടും മത്സരിക്കാൻ അവസരം നൽകിയത് വിജയിന്റെ രാഷ്ട്രീയ തന്ത്രത്തിന്റെ ഭാഗമായാണ് വിലയിരുത്തപ്പെടുന്നത്. 

മതനിരപേക്ഷ സാമൂഹികനീതി വിജയ സഖ്യത്തിന്റെ ഭാഗമായി സ്ഥാനാർഥികൾ മത്സരിക്കുമെന്ന് വിജയ് അറിയിച്ചു. പാർട്ടി പ്രവർത്തകരും നേതാക്കളും വിജയത്തിനായി ഒരുമിച്ച് പ്രവർത്തിക്കണമെന്നും അദ്ദേഹം ആവശ്യപ്പെട്ടു. കോൺഗ്രസ്, വിസികെ, എംഡിഎംകെ, ഇന്ത്യൻ യൂണിയൻ മുസ്ലിം ലീഗ് തുടങ്ങിയ കക്ഷികൾ ഉൾപ്പെടുന്നതാണ് വിജയ് നേതൃത്വം നൽകുന്ന പുതിയ സഖ്യം. 

ഒക്ടോബർ 6നാണ് മധുരാന്തകത്തും താരാപുരത്തും വോട്ടെടുപ്പ്. സെപ്റ്റംബർ 9ന് ആരംഭിച്ച നാമനിർദേശ പത്രിക സമർപ്പണം സെപ്റ്റംബർ 16ന് അവസാനിക്കും. ഒക്ടോബർ 9നാണ് വോട്ടെണ്ണൽ. ഉപതിരഞ്ഞെടുപ്പ് തമിഴ്നാട്ടിലെ പുതിയ രാഷ്ട്രീയ സമവാക്യങ്ങളിൽ തമിഴക വെട്രി കഴകത്തിന്റെ സ്വാധീനം എത്രത്തോളം ശക്തമാണെന്ന് അളക്കുന്നതിനുള്ള നിർണായക പരീക്ഷണമാകുമെന്നാണ് രാഷ്ട്രീയ നിരീക്ഷണം.