ടാസ്മാക് വരുമാന ചോർച്ച തടയാൻ വൻ അഴിമതിവിരുദ്ധ നീക്കവുമായി തമിഴ്നാട് മുഖ്യമന്ത്രി വിജയ്

ചെന്നൈ: തമിഴ്നാട്ടിലെ സർക്കാർ നിയന്ത്രണത്തിലുള്ള മദ്യവിൽപ്പന ശൃംഖലയായ ടാസ്മാക്കിൽ (TASMAC) വരുമാന ചോർച്ചയും അഴിമതിയും തടയുന്നതിനായി മുഖ്യമന്ത്രി സി. ജോസഫ് വിജയ്യുടെ നേതൃത്വത്തിലുള്ള സർക്കാർ വൻ നടപടികൾ ആരംഭിച്ചു. മദ്യവിൽപ്പനയിൽ നിന്ന് ലഭിക്കുന്ന ഓരോ രൂപയും നേരിട്ട് സർക്കാർ ഖജനാവിലേക്ക് എത്തണമെന്നും അനധികൃത പിരിവുകളും കമ്മീഷൻ സംവിധാനങ്ങളും അവസാനിപ്പിക്കണമെന്നും സർക്കാർ നിർദേശിച്ചു. 

സർക്കാരിന്റെ വിലയിരുത്തൽ പ്രകാരം, ടാസ്മാക് സംവിധാനത്തിൽ വിവിധ തരത്തിലുള്ള അനധികൃത പിരിവുകളിലൂടെ പ്രതിമാസം നൂറുകണക്കിന് കോടി രൂപയുടെ വരുമാന നഷ്ടം സംഭവിക്കുന്നുണ്ടെന്നാണ് കണ്ടെത്തൽ. മദ്യക്കുപ്പികളുടെ വിലയ്ക്ക് പുറമെ അധിക തുക ഈടാക്കുന്നതും വിതരണ-വാങ്ങൽ നടപടികളിലെ കമ്മീഷൻ സംവിധാനങ്ങളും അവസാനിപ്പിക്കാൻ സർക്കാർ ഉത്തരവിട്ടിട്ടുണ്ട്. 

ടാസ്മാക്കുമായി ബന്ധപ്പെട്ട അഴിമതി ശൃംഖല തകർക്കുകയെന്ന ലക്ഷ്യത്തോടെ പരിശോധനകളും സാമ്പത്തിക ഓഡിറ്റുകളും ശക്തമാക്കിയതായി തമിഴ്നാട് മദ്യനിരോധന-എക്സൈസ് വകുപ്പ് അറിയിച്ചു. സംസ്ഥാനത്തെ മദ്യവിൽപ്പന വരുമാനം പൂർണ സുതാര്യതയോടെ കൈകാര്യം ചെയ്യുമെന്നും ബന്ധപ്പെട്ടവർക്കെതിരെ കർശന നടപടി സ്വീകരിക്കുമെന്നും സർക്കാർ വ്യക്തമാക്കി. 

അഴിമതിക്കെതിരെ കർശന നിലപാട് സ്വീകരിക്കുമെന്ന് അധികാരമേറ്റ ഉടൻ തന്നെ വിജയ് പ്രഖ്യാപിച്ചിരുന്നു. സംസ്ഥാനത്തെ എല്ലാ വകുപ്പുകളിലും അഴിമതി ഇല്ലാതാക്കാൻ സമയപരിധി നിശ്ചയിച്ചിട്ടുണ്ടെന്നും ഭരണനടപടികളിൽ സുതാര്യത ഉറപ്പാക്കുമെന്നും അദ്ദേഹം വ്യക്തമാക്കിയിരുന്നു. 

ഇതിനിടെ, ക്ഷേത്രങ്ങൾ, വിദ്യാഭ്യാസ സ്ഥാപനങ്ങൾ, ബസ് സ്റ്റാൻഡുകൾ തുടങ്ങിയ പൊതുസ്ഥലങ്ങൾക്ക് സമീപമുള്ള 717 ടാസ്മാക് മദ്യശാലകൾ അടച്ചുപൂട്ടാനുള്ള തീരുമാനവും സർക്കാർ നടപ്പാക്കിയിട്ടുണ്ട്. സാമൂഹിക ഉത്തരവാദിത്തവും വരുമാന സുതാര്യതയും ഒരുമിച്ച് മുന്നോട്ടുകൊണ്ടുപോകുന്ന ഭരണനടപടികളുടെ ഭാഗമായാണ് ഇതിനെ വിലയിരുത്തുന്നത്. 

തമിഴ്നാട് സർക്കാരിന്റെ ഏറ്റവും വലിയ വരുമാന സ്രോതസുകളിലൊന്നാണ് ടാസ്മാക്. അതിനാൽ വരുമാന ചോർച്ച അവസാനിപ്പിച്ച് മുഴുവൻ തുകയും സർക്കാർ ഖജനാവിലെത്തിക്കുക എന്ന ലക്ഷ്യത്തോടെ ആരംഭിച്ച പുതിയ നീക്കം സംസ്ഥാന ധനകാര്യ സംവിധാനത്തിന് വലിയ ആശ്വാസമാകുമെന്നാണ് സാമ്പത്തിക വിദഗ്ധരുടെ വിലയിരുത്തൽ.