ഹോർമുസ് കടലിടുക്കിലേക്ക് പോകുന്ന കപ്പലുകളിൽ ഇന്ത്യൻ നാവികരെ നിയോഗിക്കുന്നത് താൽക്കാലികമായി വിലക്കി

ന്യൂഡൽഹി: അമേരിക്ക–ഇറാൻ സംഘർഷം രൂക്ഷമായ സാഹചര്യത്തിൽ ഹോർമുസ് കടലിടുക്കിലേക്ക് പോകുന്ന കപ്പലുകളിൽ ഇന്ത്യൻ നാവികരെ പുതുതായി നിയോഗിക്കുന്നത് കേന്ദ്ര സർക്കാർ താൽക്കാലികമായി വിലക്കി. മേഖലയിലെ സുരക്ഷാ സാഹചര്യം വിലയിരുത്തിയ ശേഷമാണ് ഡയറക്ടറേറ്റ് ജനറൽ ഓഫ് ഷിപ്പിംഗ് ഈ നിർദേശം പുറപ്പെടുവിച്ചത്.

നിലവിൽ ഹോർമുസ് കടലിടുക്കിലൂടെ സർവീസ് നടത്തുന്ന കപ്പലുകളിലെ ഇന്ത്യൻ നാവികരുടെ സുരക്ഷ ഉറപ്പാക്കാൻ കപ്പൽ കമ്പനികൾ ആവശ്യമായ മുൻകരുതലുകൾ സ്വീകരിക്കണമെന്നും നിർദേശിച്ചിട്ടുണ്ട്. സുരക്ഷാ ഭീഷണി നിലനിൽക്കുന്ന സാഹചര്യത്തിൽ ജീവനക്കാരുടെ സുരക്ഷയ്ക്കാണ് സർക്കാർ മുൻഗണന നൽകുന്നതെന്ന് അധികൃതർ അറിയിച്ചു.

ലോകത്തിലെ ഏറ്റവും പ്രധാനപ്പെട്ട എണ്ണക്കപ്പൽ ഗതാഗത പാതകളിലൊന്നാണ് ഹോർമുസ് കടലിടുക്ക്. മേഖലയിലെ സംഘർഷം രൂക്ഷമായാൽ ആഗോള ചരക്കുകടത്തിനും എണ്ണവിതരണത്തിനും വലിയ തിരിച്ചടിയുണ്ടാകുമെന്ന ആശങ്കയും നിലനിൽക്കുന്നു. നിലവിലെ സാഹചര്യങ്ങൾ സർക്കാർ നിരന്തരം നിരീക്ഷിച്ചുവരികയാണ്.