വൈദ്യുതാഘാതമേറ്റ് കുട്ടി ബോധരഹിതനായി; റോഡിന് നടുവിൽ ഡോക്ടർ സിപിആർ നൽകി

ഹൈദരാബാദ്: നടുറോഡിൽ ഷോക്കേറ്റ് അബോധാവസ്ഥയിൽ കിടന്ന ആറുവയസ്സുകാരനെ ഡോക്ടർ രക്ഷപ്പെടുത്തി. മെയ് അഞ്ചിന് ആന്ധ്രാപ്രദേശിലെ വിജയവാഡയിലാണ് സംഭവം. വൈദ്യുതാഘാതമേറ്റ് കുട്ടി ബോധരഹിതനായി. മാതാപിതാക്കൾ കുട്ടിയെ ആശുപത്രിയിലേക്ക് കൊണ്ടുപോകുന്നത് കണ്ട ഡോക്ടർ ഉടൻ തന്നെ റോഡിൽ വെച്ച് കാർഡിയോപൾമണറി റെസസിറ്റേഷൻ (സിപിആർ) നൽകി കുട്ടിയുടെ ജീവൻ രക്ഷിച്ചു. അഞ്ച് മിനിറ്റ് സിപിആറിന് ശേഷം കുട്ടിക്ക് ബോധം തിരിച്ചുകിട്ടി. സംഭവത്തിൻ്റെ വീഡിയോ സോഷ്യൽ മീഡിയയിൽ വൈറലാകുകയാണ്.

മറ്റുള്ളവർ സഹായിക്കുമ്പോൾ വനിതാ ഡോക്ടർ കുട്ടിയുടെ നെഞ്ചിൽ അമർത്തിപ്പിടിക്കുന്നത് വീഡിയോയിൽ കാണാം. അബോധാവസ്ഥയിലായ കുട്ടിയെ രക്ഷിതാക്കളും ചുമന്നുകൊണ്ടുപോകുന്നത് വഴിയരികിലെ ഡോക്ടർ കണ്ടു. അവർ ഉടൻ തന്നെ കുട്ടിയെ പരിശോധിക്കുകയും സിപിആർ നൽകുകയും ചെയ്തു. അഞ്ചു മിനിറ്റിനുശേഷം കുട്ടി ബോധം വീണ്ടെടുത്തു.

കുട്ടിയെ പിന്നീട് ആശുപത്രിയിലേക്ക് മാറ്റി എന്ന അടിക്കുറിപ്പോടെയാണ് വീഡിയോ പങ്കുവെച്ചിരിക്കുന്നത്. വീഡിയോ വൈറലായതോടെ ഡോക്ടറെ അഭിനന്ദിച്ച് നിരവധി പേർ രംഗത്തെത്തി. ഡോക്ടറുടെ ഇടപെടൽ ഒരു ജീവൻ രക്ഷിച്ചതായി പലരും അഭിപ്രായപ്പെട്ടു. സിപിആർ നൽകാൻ എല്ലാവരും പഠിക്കണമെന്ന് ചിലർ പറയുന്നു, ഇത് അത്തരം സാഹചര്യങ്ങളിൽ നിരവധി ജീവൻ രക്ഷിക്കും. എന്തായാലും സോഷ്യൽ മീഡിയയിൽ ഡോക്ടർക്ക് കൂടുതൽ ആരാധകരെ ലഭിച്ചിരിക്കുകയാണ്.