മൂന്ന് പതിറ്റാണ്ട്, നിരവധി സർക്കാരുകൾ; എന്നിട്ടും പഞ്ചാബിലെ മയക്കുമരുന്ന് പ്രതിസന്ധി തുടരുന്നത് എന്തുകൊണ്ട്?

പഞ്ചാബിൽ മൂന്ന് പതിറ്റാണ്ടിലേറെയായി വിവിധ രാഷ്ട്രീയ പാർട്ടികൾ അധികാരത്തിലെത്തുകയും മയക്കുമരുന്നിനെതിരെ നിരവധി പ്രത്യേക നടപടികൾ പ്രഖ്യാപിക്കുകയും ചെയ്തിട്ടും പ്രതിസന്ധിക്ക് ശാശ്വത പരിഹാരം കണ്ടെത്താനായിട്ടില്ല. പാകിസ്താൻ അതിർത്തിയിലൂടെ നടക്കുന്ന ഹെറോയിൻ കടത്ത്, ഡ്രോൺ വഴിയുള്ള മയക്കുമരുന്ന് വിതരണം, തൊഴിലില്ലായ്മ, സംഘടിത കുറ്റകൃത്യ ശൃംഖലകൾ, ലഹരി വിമുക്തി സംവിധാനങ്ങളുടെ പരിമിതികൾ എന്നിവയാണ് പ്രശ്നം രൂക്ഷമാക്കുന്ന പ്രധാന കാരണങ്ങളെന്ന് വിദഗ്ധർ വിലയിരുത്തുന്നു. 

അടുത്തിടെ സുപ്രീം കോടതിയും പഞ്ചാബിലെ മയക്കുമരുന്ന് വ്യാപനത്തിൽ ആശങ്ക രേഖപ്പെടുത്തിയിരുന്നു. ചികിത്സയും പുനരധിവാസവും ശക്തിപ്പെടുത്തുന്നതിനൊപ്പം കടത്തുസംഘങ്ങൾക്കെതിരായ കർശന നടപടി, അതിർത്തി സുരക്ഷ, യുവാക്കൾക്ക് തൊഴിൽ അവസരങ്ങൾ എന്നിവ ഒരുമിച്ച് നടപ്പാക്കിയാൽ മാത്രമേ പ്രശ്നത്തിന് ദീർഘകാല പരിഹാരം സാധ്യമാകൂ എന്നാണ് വിദഗ്ധരുടെ അഭിപ്രായം.