തമിഴ്നാട്ടിൽ മൂന്ന് സൗജന്യ പാചകവാതക സിലിണ്ടറുകൾ

തമിഴ്നാട്ടിൽ നിർണായക പ്രഖ്യാപനങ്ങളുമായി മുഖ്യമന്ത്രി സി. ജോസഫ് വിജയ്. അർഹരായ കുടുംബങ്ങൾക്ക് വർഷത്തിൽ മൂന്ന് സൗജന്യ എൽപിജി സിലിണ്ടറുകളുടെ ചെലവ് നൽകുമെന്നും സ്ത്രീകൾക്കുള്ള സൗജന്യ ബസ് യാത്രാ പദ്ധതി കൂടുതൽ സർവീസുകളിലേക്ക് വ്യാപിപ്പിക്കുമെന്നും നിയമസഭയിൽ മുഖ്യമന്ത്രി അറിയിച്ചു. പറന്തൂർ ഗ്രീൻഫീൽഡ് വിമാനത്താവള പദ്ധതിയും ഉപേക്ഷിക്കുമെന്ന് പ്രഖ്യാപിച്ചു.

അന്നപൂർണി സൂപ്പർ സിക്സ് പദ്ധതിയുടെ ആദ്യഘട്ടമായാണ് മൂന്ന് സൗജന്യ പാചകവാതക സിലിണ്ടറുകൾ നൽകുന്നത്. സിലിണ്ടറുകളുടെ വില ഗുണഭോക്താക്കളുടെ ബാങ്ക് അക്കൗണ്ടിലേക്ക് നേരിട്ട് കൈമാറാനാണ് തീരുമാനം. ഏകദേശം 1.3 കോടി കുടുംബങ്ങൾക്ക് പദ്ധതിയുടെ പ്രയോജനം ലഭിക്കുമെന്നാണ് റിപ്പോർട്ടുകൾ. പദ്ധതി പൊങ്കൽ മുതൽ നടപ്പാക്കാനാണ് തീരുമാനം.

സ്ത്രീകൾക്കുള്ള വെട്രി പയണം സൗജന്യ ബസ് യാത്രാ പദ്ധതിയും വിപുലീകരിക്കും. വരുമാനപരിധിയോ യാത്രകളുടെ എണ്ണത്തിന് പരിധിയോ ഉണ്ടാകില്ലെന്ന് മുഖ്യമന്ത്രി അറിയിച്ചു. സർക്കാർ ബസുകൾക്ക് പുറമെ എക്സ്പ്രസ്, ഡീലക്സ് സർവീസുകളിലും അർഹരായ സ്ത്രീകൾക്ക് സൗജന്യ യാത്ര അനുവദിക്കും.

അതേസമയം, ചെന്നൈയുടെ രണ്ടാമത്തെ വിമാനത്താവളമായി വികസിപ്പിക്കാൻ പദ്ധതിയിട്ടിരുന്ന പറന്തൂർ ഗ്രീൻഫീൽഡ് വിമാനത്താവള പദ്ധതി ഉപേക്ഷിക്കുമെന്ന് വിജയ് പ്രഖ്യാപിച്ചു. കൃഷിഭൂമിയെ ബാധിക്കുകയും കർഷകരുടെയും പ്രദേശവാസികളുടെയും ഉപജീവനത്തെ ബാധിക്കുകയും ചെയ്യുമെന്ന ആശങ്കകൾ പരിഗണിച്ചാണ് തീരുമാനമെന്ന് മുഖ്യമന്ത്രി വ്യക്തമാക്കി.

പറന്തൂരിന് പകരം വിമാനത്താവളത്തിനായി മറ്റ് സ്ഥലങ്ങൾ പരിഗണിക്കുന്നുണ്ടെന്നും റിപ്പോർട്ടുകളുണ്ട്. ചെന്നൈയുടെ വ്യോമയാന അടിസ്ഥാനസൗകര്യ വികസനം തുടരുന്നതിന്റെ ഭാഗമായി നിലവിലെ വിമാനത്താവളത്തിൽ പുതിയ ടെർമിനൽ ഉൾപ്പെടെയുള്ള വികസന നടപടികളും പരിഗണിക്കുന്നുണ്ട്.

തിരഞ്ഞെടുപ്പ് വാഗ്ദാനങ്ങളുമായി ബന്ധപ്പെട്ട പ്രധാന പദ്ധതികൾ ഒരുമിച്ച് പ്രഖ്യാപിച്ചതോടെ വിജയ് സർക്കാരിന്റെ ക്ഷേമനയങ്ങൾക്ക് കൂടുതൽ ശ്രദ്ധ ലഭിച്ചിരിക്കുകയാണ്.