ബാരാമതിയിൽ പരിശീലന വിമാനം തകർന്നുവീണു; അജിത് പവാറിന്റെ അപകടത്തിന് പിന്നാലെ രണ്ടാമത്തെ സംഭവം

മഹാരാഷ്ട്രയിലെ പൂനെ ജില്ലയിലെ ബാരാമതി എയർസ്ട്രിപ്പിന് സമീപം പരിശീലന വിമാനം അപകടത്തിൽപ്പെട്ടു. ഞായറാഴ്ച രാവിലെ ലാൻഡിങ്ങിനിടെ വിമാനം തെന്നിമാറുകയായിരുന്നു. സ്വകാര്യ സ്ഥാപനമായ Redbird Flight Training Academyയുടെ പരിശീലന വിമാനമാണ് അപകടത്തിൽപ്പെട്ടത്. പൈലറ്റിന് പരിക്കുകളൊന്നും റിപ്പോർട്ട് ചെയ്തിട്ടില്ല. 

അപകടത്തിന്റെ കൃത്യമായ കാരണം ഇതുവരെ വ്യക്തമായിട്ടില്ല. ലാൻഡിങ്ങിനിടെയാണ് വിമാനം നിയന്ത്രണം വിട്ട് റൺവേയിൽ നിന്ന് തെന്നിമാറിയതെന്നാണ് പ്രാഥമിക വിവരം. സംഭവത്തിൽ ഗുരുതര പരിക്കുകളൊന്നും ഉണ്ടായിട്ടില്ലെന്ന് പൂനെ പൊലീസ് അറിയിച്ചു. 

മഹാരാഷ്ട്ര ഉപമുഖ്യമന്ത്രി അജിത് പവാർ വിമാനാപകടത്തിൽ മരിച്ച് മാസങ്ങൾക്കുള്ളിലാണ് ബാരാമതിയിൽ വീണ്ടും വിമാനാപകടം റിപ്പോർട്ട് ചെയ്യുന്നത്. ജനുവരി 28ന് ബാരാമതി വിമാനത്താവളത്തിൽ ലാൻഡിങ്ങിനിടെ അജിത് പവാറും മറ്റ് നാല് പേരും സഞ്ചരിച്ചിരുന്ന Learjet 45XR വിമാനം തകർന്നുവീണ് എല്ലാവരും മരിച്ചിരുന്നു. 

പുതിയ സംഭവത്തോടെ ബാരാമതി വിമാനത്താവളത്തിലെ വിമാനസുരക്ഷയും അടിസ്ഥാന സൗകര്യങ്ങളും സംബന്ധിച്ച ചർച്ചകൾ വീണ്ടും ശക്തമാകുകയാണ്. അജിത് പവാറിന്റെ അപകടത്തിന് പിന്നാലെ വിമാനത്താവളത്തിന്റെ അടിസ്ഥാന സൗകര്യങ്ങൾ മെച്ചപ്പെടുത്തുന്നതിനായി ഏകദേശം 100 കോടി രൂപയുടെ നവീകരണ പദ്ധതി മഹാരാഷ്ട്ര സർക്കാർ പരിഗണിക്കുന്നുണ്ട്. 

പരിശീലന വിമാനാപകടത്തിന്റെ സാഹചര്യങ്ങളും സാങ്കേതിക കാരണങ്ങളും സംബന്ധിച്ച് അധികൃതർ കൂടുതൽ പരിശോധന നടത്തും.