'ഹീറോ ആകാൻ ശ്രമിക്കുന്നു'; മഹാരാഷ്ട്ര എഫ്.ഡി.എ കമ്മിഷണർ തുകാരാം മുണ്ടെയെ വിമർശിച്ച് സ്റ്റാർട്ടപ്പ് സ്ഥാപകൻ
മഹാരാഷ്ട്ര ഫുഡ് ആൻഡ് ഡ്രഗ് അഡ്മിനിസ്ട്രേഷൻ (FDA) കമ്മിഷണർ തുകാരാം മുണ്ടെയുടെ സ്കൂളുകളിൽ ജങ്ക് ഫുഡ് നിരോധന നടപടിയെ വിമർശിച്ച് സ്റ്റാർട്ടപ്പ് സംരംഭകൻ ചിൻമയ് എ. സിങ് രംഗത്തെത്തി. "ഒരു നല്ല മാനേജർ താൻ പോയ ശേഷവും പ്രവർത്തിക്കുന്ന ഒരു സംവിധാനം സൃഷ്ടിക്കും. ഇവിടെ ഒരാൾ ഹീറോ ആകാൻ ശ്രമിക്കുകയാണ്" എന്നായിരുന്നു അദ്ദേഹത്തിന്റെ സമൂഹമാധ്യമ കുറിപ്പ്.
ചോക്ലേറ്റ്, ചിപ്സ്, ശീതളപാനീയങ്ങൾ എന്നിവ സ്കൂൾ കാന്റീനുകളിലും സ്കൂളിന് 50 മീറ്റർ ചുറ്റളവിലും നിരോധിച്ച മുണ്ടെയുടെ ഉത്തരവ് നിയമപരമായ നടപടികളിലൂടെയും സർക്കാരിന്റെ നയതീരുമാനങ്ങളിലൂടെയും നടപ്പാക്കേണ്ടതായിരുന്നുവെന്നും, വ്യക്തിപരമായ ഉത്തരവുകളിലൂടെ അല്ലെന്നും ചിൻമയ് സിങ് വിമർശിച്ചു. മന്ത്രിയെ ബോധ്യപ്പെടുത്തി നിയമമാക്കുകയാണ് വേണ്ടതെന്നും അദ്ദേഹം അഭിപ്രായപ്പെട്ടു.
അതേസമയം, ഫുഡ് സേഫ്റ്റി ആൻഡ് സ്റ്റാൻഡേർഡ്സ് ആക്ട് പ്രകാരമാണ് ഉത്തരവ് പുറപ്പെടുവിച്ചതെന്ന് മഹാരാഷ്ട്ര എഫ്.ഡി.എ വ്യക്തമാക്കിയിട്ടുണ്ട്. സ്കൂളുകളിൽ ആരോഗ്യകരമായ ഭക്ഷണശീലം പ്രോത്സാഹിപ്പിക്കുകയെന്ന ലക്ഷ്യത്തോടെയാണ് നടപടി സ്വീകരിച്ചതെന്നും, പകരം പഴങ്ങൾ, പച്ചക്കറികൾ, ധാന്യങ്ങൾ, പയർവർഗങ്ങൾ, പാലുത്പന്നങ്ങൾ എന്നിവ ലഭ്യമാക്കണമെന്നുമാണ് നിർദേശം.
