വനിതാ സ്ഥാനാർഥിക്കെതിരായ പരാമർശം: സ്റ്റാലിനെതിരെ തെരഞ്ഞെടുപ്പ് കമ്മിഷനെ സമീപിച്ച് ടി.വി.കെ
തമിഴ്നാട്ടിലെ ധാരാപുരം ഉപതിരഞ്ഞെടുപ്പ് സ്ഥാനാർഥി പി. സത്യബാമയ്‌ക്കെതിരെ ഡി.എം.കെ. അധ്യക്ഷൻ എം.കെ. സ്റ്റാലിൻ നടത്തിയെന്ന് ആരോപിക്കപ്പെടുന്ന ശരീരത്തെ പരിഹസിച്ചുള്ള പരാമർശത്തിൽ നടപടി ആവശ്യപ്പെട്ട് തമിഴക വെട്രി കഴകം (ടി.വി.കെ.) തെരഞ്ഞെടുപ്പ് കമ്മിഷനെ സമീപിച്ചു. തെരഞ്ഞെടുപ്പ് പെരുമാറ്റച്ചട്ടം ലംഘിച്ചെന്നാണ് ടി.വി.കെ.യുടെ പരാതി.
ടി.വി.കെ. ജനറൽ സെക്രട്ടറി ആദവ് അർജുനയാണ് തമിഴ്നാട് ചീഫ് ഇലക്ടറൽ ഓഫീസർക്ക് പരാതി നൽകിയത്. സ്റ്റാലിന്റെ സ്റ്റാർ ക്യാംപെയ്‌നർ പദവി റദ്ദാക്കണമെന്നും ജില്ലാ തെരഞ്ഞെടുപ്പ് ഉദ്യോഗസ്ഥന് എഫ്.ഐ.ആർ രജിസ്റ്റർ ചെയ്യാൻ നിർദേശം നൽകണമെന്നും പരാതിയിൽ ആവശ്യപ്പെട്ടു.
ഒക്ടോബർ രണ്ടിന് ധാരാപുരത്ത് നടന്ന തെരഞ്ഞെടുപ്പ് പ്രചാരണയോഗത്തിനിടെയാണ് സത്യബാമയുടെ ശാരീരിക രൂപത്തെ പരാമർശിക്കുന്ന തരത്തിലുള്ള പരാമർശം സ്റ്റാലിൻ നടത്തിയതെന്നാണ് ടി.വി.കെ.യുടെ ആരോപണം. സ്ഥാനാർഥിയുടെ രാഷ്ട്രീയ നിലപാടുകളുമായോ പ്രവർത്തനങ്ങളുമായോ ബന്ധമില്ലാത്ത വ്യക്തിപരമായ പരാമർശമാണിതെന്നും പാർട്ടി ചൂണ്ടിക്കാട്ടി.
സംഭവത്തിൽ ടി.വി.കെ. അധ്യക്ഷനും തമിഴ്നാട് മുഖ്യമന്ത്രിയുമായ സി. ജോസഫ് വിജയ് സ്റ്റാലിനെതിരെ വിമർശനം ഉന്നയിച്ചിരുന്നു. വനിതകളെ അപമാനിക്കുന്ന തരത്തിലുള്ള പരാമർശങ്ങൾക്കെതിരെ ശക്തമായ നടപടി വേണമെന്ന നിലപാടാണ് ടി.വി.കെ. നേതാക്കൾ സ്വീകരിച്ചത്. അതേസമയം, സ്റ്റാലിന്റെ പരാമർശം രാഷ്ട്രീയ പ്രചാരണത്തിന്റെ ഭാഗമായിരുന്നുവെന്നതാണ് ഡി.എം.കെ. പക്ഷത്തിന്റെ നിലപാട്.
ധാരാപുരം ഉൾപ്പെടെ രണ്ട് നിയമസഭാ മണ്ഡലങ്ങളിലാണ് ഒക്ടോബർ ആറിന് ഉപതിരഞ്ഞെടുപ്പ് നടക്കുന്നത്. ഉപതിരഞ്ഞെടുപ്പിന് മുന്നോടിയായുള്ള രാഷ്ട്രീയ പ്രചാരണം ശക്തമായ സാഹചര്യത്തിലാണ് സ്റ്റാലിനെതിരായ ടി.വി.കെ.യുടെ പരാതി.
