ഉദയനിധി സ്റ്റാലിൻ കരൂരിൽ സന്ദർശനം നടത്തി, മൃതദേഹങ്ങൾ കണ്ട് മന്ത്രി പൊട്ടിക്കരഞ്ഞു

ചെന്നൈ: ടിവികെ മേധാവിയും തമിഴ് സൂപ്പർസ്റ്റാറുമായ വിജയ് സംഘടിപ്പിച്ച പ്രചാരണ റാലി വൻ ദുരന്തത്തിൽ കലാശിച്ചതിനെ തുടർന്ന് തമിഴ്‌നാട് ഞെട്ടലിലാണ്. മുഖ്യമന്ത്രി എം കെ സ്റ്റാലിൻ, ഉപമുഖ്യമന്ത്രി ഉദയനിധി സ്റ്റാലിൻ, ഡിഎംകെ മന്ത്രിമാർ തുടങ്ങിയവർ ആശുപത്രിയിൽ തിക്കിലും തിരക്കിലും പെട്ട് മരിച്ചവരെ സന്ദർശിച്ചു. കുട്ടികളുടെ മൃതദേഹങ്ങൾ കണ്ട ശേഷം തമിഴ്‌നാട് വിദ്യാഭ്യാസ മന്ത്രി അൻബിൽ മഹേഷ് പൊയ്യമൊഴി തകർന്നു.

കരൂർ ഗവൺമെന്റ് മെഡിക്കൽ കോളേജ് സന്ദർശന വേളയിൽ മന്ത്രി വികാരാധീനനായി. മുൻ മന്ത്രി വി സെന്തിൽ ബാലാജിയും അദ്ദേഹത്തോടൊപ്പം ഉണ്ടായിരുന്നു. മന്ത്രി പൊട്ടിക്കരയുന്ന ദൃശ്യങ്ങൾ സോഷ്യൽ മീഡിയയിൽ വ്യാപകമായി പ്രചരിക്കുന്നുണ്ട്.

തമിഴ്നാട്ടിൽ വിജയ് സംഘടിപ്പിച്ച ഒരു രാഷ്ട്രീയ റാലി വൻ ദുരന്തത്തിൽ കലാശിച്ചു. കരൂരിൽ ഉണ്ടായ തിക്കിലും തിരക്കിലും 39 പേർ മരിച്ചു. റാലിയിൽ കുട്ടികളും സ്ത്രീകളും ഉൾപ്പെടെ പതിനായിരക്കണക്കിന് പേർ പങ്കെടുത്തു. പരിക്കേറ്റവരിൽ 111 പേർ ആശുപത്രികളിൽ ചികിത്സയിലാണ്. 10 പേരുടെ നില വളരെ ഗുരുതരമാണ്. മരണസംഖ്യ ഇനിയും ഉയരാൻ സാധ്യതയുണ്ട്. എല്ലാ മൃതദേഹങ്ങളും തിരിച്ചറിഞ്ഞിട്ടുണ്ട്. 32 പേരുടെ മൃതദേഹങ്ങൾ വിട്ടയച്ചു.

മരിച്ചവരുടെ കുടുംബങ്ങൾക്ക് തമിഴ്‌നാട് സർക്കാർ 10 ലക്ഷം രൂപ വീതം ധനസഹായം പ്രഖ്യാപിച്ചു. ഇന്നലെ രാത്രി 8 മണിയോടെയാണ് അപകടം നടന്നത്. സംഭവത്തിൽ സർക്കാർ ജുഡീഷ്യൽ അന്വേഷണം പ്രഖ്യാപിച്ചു. കേസ് രജിസ്റ്റർ ചെയ്തിട്ടുണ്ടെന്ന് ഡിജിപി പറഞ്ഞു. കരൂർ വെസ്റ്റ് ടിവികെ സെക്രട്ടറിയെ പ്രതി ചേർത്തിട്ടുണ്ട്.